Mae Tywysog Cymru wedi dweud ei fod wedi’i “siomi’n llwyr” ar ôl i’r Ariannin chwalu gobeithion Lloegr yn rownd gyn-derfynol Cwpan y Byd.

Roedd dicter hefyd ymhlith sylwebwyr pêl-droed yn Lloegr, gyda'r newyddiadurwr Henry Winter yn dweud bod tactegau Lloegr yn yr ail hanner yn “warthus” a bod cefnogwyr bellach yn wynebu “cywilydd” y gêm am y trydydd safle.

Fe wnaeth Lloegr fynd 1-0 ar y blaen yn erbyn yr Ariannin gyda gôl yn gynnar yn yr ail hanner, cyn i’r tîm fynd i’w gragen yn amddiffynnol a chaniatáu dwy gôl hwyr yn yr 85fed a’r 92ain munud.

Mewn neges i dîm Lloegr, dywedodd Tywysog Cymru ei fod eisiau diolch iddyn nhw am “dwrnamaint anhygoel”.

“Wedi fy siomi’n llwyr,” meddai William.

“Lloegr, fe wnaethoch chi roi popeth, ac rydyn ni i gyd mor falch ohonoch chi. Diolch i bawb ar y cae ac oddi arno am dwrnamaint anhygoel.

“Mae’r frwydr a’r gred rydych chi wedi’u dangos wedi ein hysbrydoli ni i gyd. Dyma’r tîm Lloegr mwyaf cyflawn mewn twrnamaint. Daliwch eich pennau’n uchel.”

Dywedodd y Prif Weinidog, Keir Starmer, ei fod yntau wedi’i “siomi” ar ôl i dîm yr hyfforddwr Thomas Tuchel golli.

Mewn neges ar X, dywedodd Syr Keir: “Nid dyma’r canlyniad roedden ni i gyd yn gobeithio amdano heno, ond mae’r tîm hwn o Loegr wedi rhoi popeth.

“Mae’r angerdd a’r egni maen nhw wedi’u dangos wrth gynrychioli’r bathodyn wedi ein gwneud ni i gyd yn falch.”

‘Ffortiwn’

Mae sylwebwyr pêl-droed wedi beirniadu tactegau’r hyfforddwr Thomas Tuchel, yn benodol ei benderfyniad i chwarae gêm amddiffynnol ar ôl mynd 1-0 ar y blaen.

Dywedodd sylwebydd y BBC Henry Winter ei fod yn “flin” a bod y tactegau yn “warthus”.

“Os nad ydyn ni’n cynhyrfu mewn sefyllfa fel hon, pryd ydyn ni’n cael cynhyrfu?” gofynnodd.

“Fe ddylen ni fod yn flin am sefyllfa fel hon. Mae’n warthus.

“Rydw i’n gobeithio bod pobl o fewn yr FA a fydd yn ei herio ef [Thomas Tuchel] am hyn.

“Dydw i ddim yn meddwl bod unrhyw un yn yr FA sy’n mynd i herio Tuchel, ac efallai mai’r unig berson sydd â’r dewrder i wneud hynny yw chwaraewr gorau Lloegr, Jude Bellingham.

“Rydw i’n gobeithio y bydd e’n mynd yno ac yn dweud, ‘edrycha ar dy eilyddion, edrycha arnat ti dy hun, edrycha ar beth wnest ti i’r tîm hwn, edrycha ar beth wnest ti i’r 20,000 o gefnogwyr Lloegr hynny a wariodd ffortiwn llwyr i ddod allan yma ac sydd bellach yn wynebu cywilydd y gêm ail gyfle am y trydydd safle’.”

Dywedodd un arall o sylwebwyr y BBC, y cyn-ymosodwr Wayne Rooney, fod Lloegr wedi mynd “ar y droed ôl”.

“Mae’r rheolwyr gorau yn cymryd camau i newid yr hyn sy’n digwydd yn lle encilio’n ddyfnach i’w hanner eu hunain,” meddai.

“Roedd angen newid tempo a rhythm y gêm. Dw i’n meddwl ei fod wedi gwneud camgymeriad.

“Yn erbyn y tîm hwn, pencampwyr y byd, does dim modd gwneud hynny. Dyma oedd y prawf mwyaf ac rydyn ni wedi’i fethu.”

‘Trychineb tactegol’

Roedd siom hefyd ymhlith y cefnogwyr a oedd yn bresennol yn y gêm, gyda rhai wedi talu dros $1,000 am docyn.

Dywedodd Ben Harper, 32 oed, o Stoke-on-Trent, wrth asiantaeth newyddion PA y tu allan i’r stadiwm: “Yn yr ail hanner, fe wnaethon ni gipio’r gôl ac roeddwn i’n meddwl, iawn, mae’r momentwm gyda ni.

“Yna, doedd dim byd. Eilyddion negyddol, chwaraewyr amddiffynnol yn dod ymlaen, ac rydych chi’n meddwl, iawn, yn erbyn Mecsico gyda 10 dyn, digon teg.

“Ond wedyn, am 30 munud yn erbyn y tîm gorau yn y twrnamaint o ran dod yn ôl mewn gemau, ai’r strategaeth orau oedd eistedd yn ôl?

“Yna fe wnaethon nhw sgorio ac roedd hi’n 1-1. Rydych chi’n meddwl, mae’r momentwm o’u plaid nhw. Beth sydd gyda ni? Beth ydyn ni’n mynd i’w wneud?

“Rydyn ni wedi cyfyngu ein hopsiynau ymosodol, a does gennym ni ddim llawer o ddewisiadau. Roedd hynny’n drychineb tactegol, a dweud y gwir.”

Dywedodd Harry Fine, o Lundain, wrth PA ei fod wedi’i “gynhyrfu” gan y canlyniad.

“Beth ydyn ni’n ei wneud? Beth ydyn ni’n ei wneud?” gofynnodd.

“Rydw i’n caru Harry Kane ac rydw i’n gefnogwr Arsenal. Rydw i eisiau iddo wneud popeth dros ein gwlad. Ble oeddet ti, Harry?

“Fe wnaethon ni fethu dan y pwysau.”

Pan ofynnwyd iddo a oedd yn credu bod Lloegr wedi cael cyfle i fynd yr holl ffordd, dywedodd: “Oedd. Roedd yn ein dwylo ni.”