Dwy ferch yn ddiogel ar ôl digwyddiad padlfyrddio ym Môn
28/06/2026
Mae dwy ferch yn ddiogel ar ôl cael eu hysgubo oddi ar eu bwrdd padlfyrddio ger arfordir Ynys Môn brynhawn Sadwrn.
Yn dilyn galwad gan Wylwyr y Glannau, cafodd Bad Achub Moelfre eu galw i Draeth Llanddona yn nwyrain yr ynys i'w hachub.
Erbyn hynny, roedd rhieni'r merched wedi mynd i'r dŵr i geisio eu helpu ac fe lwyddodd y pedwar i gyrraedd y lan yn ddiogel.
Wrth i'r bad achub fynd i nôl y bwrdd padlfyrddio a'i ddychwelyd i gyfeiriad y traeth, cafodd y criw eu galw i ymateb i adroddiad arall am berson a oedd mewn trafferth ar ôl i'w canŵ droi drosodd ger Llanddona.
Oherwydd y gwyntoedd cryfion a'r môr garw, cafodd bad achub pob tywydd Moelfre, ei alw am 14.03, ynghyd â hofrennydd Gwylwyr y Glannau.
Wedi gwaith chwilio trylwyr, ni ddaeth y criwiau o hyd i unrhyw un yn y môr.
Yn dilyn y digwyddiadau, mae Bad Achub Moelfre yn annog pobl i fod yn ymwybodol o beryglon mynd i'r môr pan fo gwyntoedd cryfion.
