O Kylian Mbappé i Erling Haaland, mae Pencampwriaeth Euro Dan-19 UEFA wedi bod yn llwyfan i rai o sêr pêl-droed ifanc amlycaf y gamp ddisgleirio dros y blynyddoedd diwethaf. A nos Sul, fe fydd y gystadleuaeth yn cyrraedd Dinbych.

Mae’r dref yn un o bedwar lleoliad sydd wedi’u dewis i gynnal gemau’r gystadleuaeth, gyda Wrecsam, Bangor a Chaernarfon. 

Fe fydd chwaraewyr o Real Madrid, Barcelona a Bayern Munich yn chwarae ym Mharc Canolog dros yr wythnosau nesaf, wrth i Sbaen, Yr Almaen a Denmarc chwarae ar y maes.

Inline Tweet: https://twitter.com/UEFAMensYouth/status/2070488675138371587?s=20

Dywedodd Cadeirydd y clwb, Shon Powell bod yr awyrgylch yn "arbennig iawn".

"Mae hwn yn gyfle unwaith mewn oes, ac mae ysbryd y gymuned yn wych," meddai wrth Newyddion S4C.

"Fydd hyn ddim yn digwydd eto yn Ninbych yn ystod ein hoes ni, felly roedd yn rhaid i ni fachu ar y cyfle gyda'r ddwy law a chofleidio'r digwyddiad, ac mae'r gymuned gyfan wedi gwneud hynny."

Mae’r digwyddiad yn benllanw 12 mlynedd o waith caled i wirfoddolwyr y clwb, sydd yn chwarae yn yr ail adran ar hyn o bryd, sef cynghrair JD Cymru North.

Dros y cyfnod hwn, mae gwaith wedi’i wneud er mwyn gwneud y cae yn fwy, gosod gantri ar gyfer camerâu teledu, adeiladu system dyfrio, gosod ystafelloedd newid o ansawdd a lolfa lletygarwch â balconi yn ogystal â 2,000 medr o geblau ar ymyl y cae.

Image

Mae tua £2 filiwn wedi’i wario ar y holl welliannau, gydag arian gan Sefydliad Pêl-Droed Cymru (CFF), ar ran Cymdeithas Bêl-Droed Cymru, yn cyfuno ag ymdrechion di-flino'r clwb i godi arian.

Ychwanegodd Mr Powell: "Rwy'n falch iawn, iawn yn wir. 

"Roedd gennym ni gynllun bron o'r dechrau. Fe wnaethon ni lunio cynllun 15 mlynedd tua 12 mlynedd yn ôl, ac rydyn ni wedi gweithio'n unol â chynllun lle roedden ni'n gwneud rhywbeth bob haf i wella'r cae.

"Fe wnaethon ni ddechrau codi arian drwy grantiau lleol. Yna, hanner ffordd drwy'r broses honno, enillodd Cymru'r cyfle i gynnal Pencampwriaeth Euro Dan-19 UEFA. Roedd Cymdeithas Bêl-droed Cymru eisoes yn gwybod bod gennym gae o safon uchel iawn.

Image

Image

"Rydyn ni wedi adeiladu clwbdy newydd, wedi gosod system ddyfrhau, ac wedyn y peth nesaf ar y rhestr oedd adeiladu ystafelloedd newid newydd gan nad oedden nhw'n addas. Felly fe wnaethon ni lunio cynlluniau ar gyfer hynny.

"Ddwy flynedd a hanner yn ddiweddarach, mae gennym ni'r maes anhygoel yma, sydd i gyd yn newydd sbon. 

"Mae ganddo gyfleusterau gwych, ac mae'r cae ei hun yn arbennig. 

"Mae'r un maint â Wembley, yr un maint ag Old Trafford - ac ydyn, rydyn ni'n falch iawn ohono. 

"Mae gennym ni'r seilwaith yma hefyd i gynnal gemau rhyngwladol yn y dyfodol."

‘Sêr y dyfodol’

Inline Tweet: https://twitter.com/sgorio/status/2070452770251899198?s=20

Fe chwaraeodd timau dan 16 o Frasil a Sbaen ar y cae bedair blynedd yn ôl,  yn rhan o gystadleuaeth datblygiad UEFA, ac mae’r gystadleuaeth hon yn gam yn uwch mewn safon.

Dywedodd Ollie Beech, Swyddog Cyfryngau CPD Dinbych: "Mae sêr go iawn y byd pêl-droed yn mynd i chwarae ar y cae yma. 

"Pan edrychwch ar y chwaraewyr sydd wedi chwarae yn y bencampwriaeth yn y gorffennol - Kylian Mbappé, Harry Kane, Antoine Griezmann, Viktor Gyökeres - mae'r rhestr yn ddiddiwedd.

"Bydd Xavi Espart, sydd newydd wneud ei ymddangosiad cyntaf dros Barcelona yng Nghynghrair Pencampwyr UEFA ac yn La Liga, a Diego Aguado, sydd wedi chwarae ei gêm gyntaf dros dîm cyntaf Real Madrid, yn chwarae dros Sbaen. 

"Mae'n annhebygol iawn y cewch chi gyfle i'w gweld yn chwarae ar gae o'r maint yma byth eto."

Image

Yn ôl Mr Beech, bydd hynny'n "atyniad enfawr i bobl ddod yma".

"Mae poblogaeth Dinbych tua 9,000. Mae chwaraewyr ar y cae yma sy'n chwarae eu gemau cartref mewn meysydd sydd â digon o le i ddal pob un o drigolion Dinbych 10 gwaith drosodd," ychwanegodd.

Bydd holl gemau Cymru ym Mhencampwriaeth UEFA Euro Dan-19 yn cael eu dangos yn fyw ar-lein ar S4C Clic, BBC iPlayer a sianel YouTube Sgorio.

Prif Lun: Kylian Mbappê, Erling Haaland a tharian UEFA Euro Dan-19 yng Nghlwb Pêl-droed Dinbych. (Anton Zaitsev/Michael Emilio/Cymdeithas Bêl-droed Cymru)