Mae Prif Gwnstabl Cynorthwyol Heddlu Gogledd Iwerddon wedi galw ar bobl i “bwyllo” wedi i ddyn o Sudan gael ei arestio ar amheuaeth o drywanu yn Belfast.

Daw wrth i’r heddlu baratoi ar gyfer protestiadau yn y rhanbarth nos Fawrth yn sgil yr ymosodiad honedig.

Mae dioddefwr yr ymosodiad â chyllell wedi cael anafiadau sylweddol i’w lygaid.

Dywedodd yr heddlu bod gan yr ymosodwr honedig ganiatâd i aros yn y DU ar ôl teithio i Ogledd Iwerddon o Ddulyn.

Roedd y dyn sy'n cael ei amau, sydd yn ei 30au, hefyd wedi gadael clwyfau ar wyneb a chefn y dioddefwr, yn ôl yr heddlu.

Dywedodd y Prif Gwnstabl Cynorthwyol Ryan Henderson nad oedd unrhyw arwydd bod yr ymosodiad yn gysylltiedig â therfysgaeth.

Mae Heddlu Gogledd Iwerddon wedi datgan “digwyddiad o bwys” wrth ymateb i’r ymosodiad.

Fe gafodd ei ffilmio ar fideo ac mae’n ymddangos fel pe bai’n dangos dyn yn trywanu pen a gwddf y dioddefwr tra oedd yn gorwedd ar y llawr.

Mae’r clip yn dangos pobl, gan gynnwys un person â ffon o’r gamp hyrli (hurling) yn ymyrryd i atal y dyn rhag ymosod ar y dioddefwr mewn ardal breswyl ger Ffordd Antrim.

Cafodd cyllell gegin ei darganfod yn y fan a’r lle, meddai Mr Henderson.

Dywedodd yr heddlu i ddechrau eu bod yn credu bod y dyn o dan amheuaeth yn dod o Somalia, ond fe wnaethon nhw egluro wedyn mai dyn o Sudan ydyw.

Dywedodd Mr Henderson wrth ohebwyr yn Belfast: “Ar hyn o bryd, nid oes gennym unrhyw wybodaeth sy’n awgrymu bod hwn yn ddigwyddiad a oedd yn gysylltiedig â therfysgaeth.

“Fodd bynnag, mae’n rhaid i mi bwysleisio - mae’n rhaid i mi bwysleisio - ein bod yn dal yng nghamau cynnar ein hymchwiliad.”

Dywedodd Mr Henderson ei fod yn ymwybodol o gynlluniau ar gyfer protestiadau yng Ngogledd Iwerddon mewn ymateb i’r digwyddiad. 

Apeliodd ar bobl i sicrhau bod y protestiadau yn rhai heddychlon.