Mae'r gwasanaethau brys wedi galw ar bobl i gadw draw o bentref ar Ynys Môn yn dilyn digwyddiad yno.

Cyhoeddodd Gwasanaeth Tân ac Achub Gogledd Cymru neges ar y cyfryngau cymdeithasol ychydig cyn hanner nos, nos Iau, yn galw ar bobl i osgoi ardal Mynydd Mechell ger Amlwch.

"Cadwch draw o'r ardal tra byddwn yn delio gyda’r digwyddiad os gwelwch yn dda", meddai llefarydd.

Yr un oedd y neges gan Heddlu'r Gogledd hefyd:

"Mae Heddlu Gogledd Cymru a Gwasanaeth Tân ac Achub Gogledd Cymru ar hyn o bryd yn bresennol mewn digwyddiad ym Mynydd Mechell, Amlwch. Osgowch yr ardal tan hysbysiad pellach."

Nid oes rhagor o wybodaeth am union natur y digwyddiad ar hyn o bryd.