Mae’r Unol Daleithiau wedi cynnal ymosodiadau newydd ar dargedau yn Iran.

Fe wnaeth lluoedd America gadarnhau eu bod wedi targedu safleoedd lansio taflegrau a chychod oedd yn ceisio gosod dyfeisiau ffrwydrol (mines).

Roedd y cyrchoedd yn rhai "hunan amddiffyn" meddai'r datganiad gan luoedd y wlad.

Daw’r ymosodiadau wedi i America ddweud bod trafodaethau rhwng y ddwy wlad dros gytundeb heddwch yn symud ymlaen. 

Mae llefarydd ar ran Iran hefyd wedi cadarnhau bod “fframwaith wedi’i gytuno.”

Nid yw Iran wedi ymateb i’r ymosodiadau diweddaraf ac nid yw’n eglur pa effaith y bydd y cyrchoedd yn cael ar y trafodaethau.

Wedi’r cyrchoedd dywedodd yr Ysgrifennydd Gwladol ar gyfer yr UDA, Marco Rubio y byddai cytundeb rhwng y ddwy wlad yn bosib.

“Fe gawn ni weld os y gallwn symud y trafodaethau ymlaen.”

Dywedodd bod yr Arlywydd Trump “yn dymuno” cael cytundeb.

“Fe fydd naill ai yn creu cytundeb da, neu ddim cytundeb o gwbl,” meddai Rubio.

Daw ei sylwadau wedi i brisiau olew syrthio ddydd Llun yn sgil gobeithion y gallai rhyfel yr Unol Daleithiau ac Israel ag Iran ddod i ben.