Mae'r darlledwr Andy Kershaw, a gyflwynodd i BBC Radio 1 am bron i 15 mlynedd, wedi marw'n 66 oed.

Fe wnaeth y DJ dreulio bron i dri degawd yn gweithio i'r gorfforaeth, ac roedd yn fwyaf adnabyddus am ei sioe Radio 1 a gafodd ei darlledu rhwng 1985 a 2000.

Ym mis Ionawr, cyhoeddodd Mr Kershaw, oedd yn enedigol o Rochdale, ei fod yn derbyn triniaeth canser ar ôl i diwmorau gael eu darganfod yn ei asgwrn cefn fis Awst y llynedd.

Fe wnaeth ddechrau ei yrfa gyda'r BBC yn 1984 fel cyflwynydd y sioe gerddoriaeth roc Old Grey Whistle Test, ac yn ddiweddarach cyd-gyflwynodd ddarllediad teledu'r gorfforaeth o gyngerdd Live Aid.

Fe ymunodd y DJ â Radio 1 fel olynydd i'r diweddar John Peel, a daeth yn adnabyddus am ei flas eclectig mewn cerddoriaeth.

Yn ystod ei yrfa, roedd hefyd wedi teithio ar draws y byd i adrodd ar wrthdaro a straeon diwylliannol i'r BBC, gan gyfrannu at sioeau Radio 4 gan gynnwys y rhaglenni From Our Own Correspondent, Today a The World Tonight.

Roedd ei ddarllediadau'n cynnwys hil-laddiad Rwanda yn 1994, ac adroddiadau o Sierra Leone yn 2001 yn ystod cyfnod olaf rhyfel cartref y wlad.

Fe dderbyniodd nifer o Wobrau Academi Radio Sony drwy gydol ei yrfa, a chafodd ei ddathlu am ddod â cherddoriaeth y byd i radio prif ffrwd.

Fe ymunodd y DJ â BBC Radio 3 yn 2001 ond gadawodd y swydd yn 2007, ar ôl wynebu cyfres o broblemau personol ar ôl i'w berthynas hirdymor chwalu.

Roedd Mr Kershaw mewn perthynas 17 mlynedd gyda Juliette Banner, ac roedd gan y ddau ddau o blant gyda'i gilydd.

Bu'r cwpl yn byw ar Ynys Manaw gyda'i gilydd cyn gwahanu yn y pen draw.

Fe ddychwelodd y darlledwr i'r BBC yn ddiweddarach yn 2010 i gyflwyno ei raglen Music Planet ynghyd â Lucy Duran, ac eto yn 2020 am gyfnod byr ar Radio 3 yn cyflwyno The Kershaw Tapes.

Fe aeth ymlaen i lansio ei bodlediad ei hun yn ystod y blynyddoedd diwethaf.