Mae'r canwr Max Boyce MBE a phêl-droediwr sydd a'r nifer mwyaf o gapiau dros Gymru, Jess Fishlock MBE, wedi cael eu anrhydeddu yng Ngwobrau Dewi Sant eleni.

Derbyniodd Max y wobr Diwylliant i gydnabod ei gyfraniad dros ddegawdau at fywyd Cymru. 

Anrhydeddwyd Jess Fishlock gyda'r wobr Chwaraeon. Jess yw'r pêl-droediwr cyntaf i ennill 100 o gapiau rhyngwladol dros Gymru, a bu'n allweddol wrth arwain Tîm Cenedlaethol Merched Cymru i'w rowndiau terfynol ym Mhencampwriaeth EURO UEFA  am y tro cyntaf erioed y llynedd.

Mae Gwobrau Dewi Sant wedi dathlu cyflawniadau dros 300 o bobl o bob cwr o Gymru dros yr 13 blynedd ddiwethaf.

Ymhlith yr enillwyr eraill mae Brian Jones o Benmaenmawr, a dderbyniodd y wobr Gwirfoddoli am dros 40 mlynedd o wasanaeth gyda Chŵn Chwilio ac Achub Rhyngwladol Prydain.

Aeth Gwobr Arbennig Eluned Morgan i Henry Engelhardt CBE a'i wraig Diane Briere de l'Isle Engelhardt OBE, gan gydnabod y ffaith eu bod wedi creu miloedd o swyddi yn Admiral Insurance a'u gwaith dyngarol drwy Sefydliad Moondance, yn enwedig wrth gefnogi ymchwil canser yng Nghymru.

Dywedodd y Prif Weinidog, Eluned Morgan: "Rwy'n falch iawn o ddathlu cyflawniadau anhygoel Max Boyce. Ers cenedlaethau, mae ei ganeuon wedi ennyn balchder Cymreig, gan gipio calon y genedl gyda'i gerddoriaeth, ei hiwmor a'i gynhesrwydd. Mae'n drysor cenedlaethol, ac rydym yn hynod falch ohono.

"Mae Jess Fishlock yn eicon chwaraeon Cymreig, sy'n ysbrydoli cenhedlaeth o bêl-droedwyr ifanc. Mae Henry a Diane yn enghreifftiau disglair o'r hyn y mae'n ei olygu i fuddsoddi mewn cenedl.

"Mae wedi bod yn fraint anrhydeddu pob un o'r enillwyr eleni sy'n fy ngwneud hyd yn oed yn fwy balch o fod yn Gymro. Mae pawb sydd wedi cyrraedd y rownd derfynol yn ysbrydoliaeth i ni i gyd."

Yr enillwyr yw:

Cian Evans – Gwobr Person Ifanc

Liz Hopkin, Darrel Campbell, Fiona Elias – Gwobr Dewrder

de Novo Solutions – Gwobr Busnes

Grŵp Dysgu Rhieni, Ysgol Uwchradd Cathays – Gwobr Hyrwyddwr Cymunedol

Deorfa Cynrig Hatchery - Gwobr Hyrwyddwr yr Amgylchedd

Yr Athro Joanne Davies – Gwobr Gwyddoniaeth a Thechnoleg Arloesi

Dr Tipswalo Day  – Gwobr Gwasanaeth Cyhoeddus

Brian Jones – Gwobr Gwirfoddoli

Jess Fishlock MBE – Gwobr Chwaraeon

Max Boyce MBE – Gwobr Diwylliant