Dyn wedi marw ar ôl 'digwyddiad difrifol' ym Mhrifysgol Caerdydd
Mae dyn wedi marw ar ôl 'digwyddiad difrifol' ym Mhrifysgol Caerdydd brynhawn Gwener.
Cafodd yr heddlu eu galw i Heol y Maendy yn y brifddinas tua 15.45 ddydd Gwener yn dilyn adroddiad bod dyn wedi disgyn o bumed llawr adeilad y brifysgol.
Roedd y gwasanaethau brys hefyd wedi cael eu galw i'r lleoliad, ond bu farw'r dyn yn y fan a'r lle.
Dywedodd Heddlu'r De: "Ar hyn o bryd nid oes unrhyw amgylchiadau amheus ac mae perthnasau agosaf y dyn a'r crwner wedi cael gwybod.
"Nid yw corff y dyn wedi'i adnabod yn ffurfiol eto."
Fe wnaeth Prifysgol Caerdydd gadarnhau bod "digwyddiad difrifol" yn ymwneud ag aelod o staff.
"Gallwn gadarnhau bod digwyddiad difrifol wedi digwydd yn ymwneud ag aelod o staff academaidd y brifysgol ddydd Gwener," meddai llefarydd.
"Roedd y gwasanaethau brys yn bresennol, ac rydym yn parhau i gynorthwyo’r heddlu, ac eraill, gyda’u hymchwiliadau parhaus.
"Ar hyn o bryd, mae’n bwysig peidio â dyfalu am y digwyddiad na’r amgylchiadau sy’n gysylltiedig ag ef."
Mae'r brifysgol yn annog staff neu fyfyrwyr sy’n bryderus ac sydd wedi cael eu heffeithio i ddefnyddio eu gwasanaethau cymorth.
"Gan fod hon yn parhau i fod yn sefyllfa sy’n datblygu, byddai’n amhriodol cynnig sylwadau pellach," ychwanegodd.
"Byddwn yn rhannu diweddariadau pellach gyda staff cyn gynted ag y gallwn."
