Fe ddaeth Elfyn Evans yn ail yn rali gyntaf y tymor Pencampwriaeth Rali’r Byd ym Monte-Carlo dros y penwythnos.

Fe orffennodd y gŵr o Ddinas Mawddwy, a’i gyd-yrrwr Scott Martin, 51.8 eiliad y tu ôl i’r enillydd Peter Solberg ar ddiwedd “penwythnos heriol”.

Fe ddaeth pencampwr y llynedd, Sebastian Ogier, yn drydydd, i sicrhau mai gyrwyr y tîm Toyota Gazoo gipiodd pob safle ar y podiwm.

Gyda’r tywydd gaeafol yn creu amodau heriol i bawb, roedd hwn yn ddechrau cadarn i Evans wrth iddo unwaith eto geisio sicrhau pencampwriaeth y byd am y tro cyntaf yn ei yrfa. Llynedd fe gollodd i Ogier yn rali olaf y tymor.

Inline Tweet: https://twitter.com/RalioS4C/status/2015444516400980424?s=20

“Mae’n ganlyniad ffantastig i’r tîm, llongyfarchiadau enfawr i Peter," meddai Evans.

"Wrth gwrs byddai wedi bod yn neis i frwydro am y fuddugoliaeth, ond doedd gennym ni ddim beth oedd angen i gystadlu hefo nhw'r penwythnos hwn.

“Hwn yn sicr oedd y Rali Monte-Carlo anoddaf yn fy ngyrfa. Hyd yn oed heddiw, doedd yna ddim saib i'r heriau, ond mae gorffen hefo cyfanswm pwyntiau da ar ddiwedd dydd Sul yn dda i ni.”

Bydd y rali nesaf yn cael ei chynnal yn Sweden ar benwythnos Chwefror 12-15.