Mae Cymdeithas Bêl-droed Cymru yn ymchwilio i ymosodiad honedig mewn gêm bêl-droed ym Mhorthmadog ddydd Sadwrn.

Digwyddodd yr ymosodiad honedig mewn gêm yng Nghynghrair Gogledd Orllewin Cymru rhwng Porthmadog a Bae Trearddur.

Enillodd Porthmadog y gêm o 3-2.

Mae fideo ar y cyfryngau cymdeithasol yn ymddangos fel petai chwaraewr Bae Trearddur yn defnyddio'i benelin i daro wyneb chwaraewr Porthmadog yn ystod y gêm.

Fe ddigwyddodd yr ymosodiad honedig wrth i Borthmadog gymryd cic o'r smotyn.

Dywedodd Cymdeithas Bêl-droed Cymru wrth Newyddion S4C eu bod "yn ymwybodol o'r digwyddiad honedig a byddant yn ymchwilio i'r mater".