Fe wnaeth ei brawd ddarganfod lwmp yn ddiweddar gan dderbyn diagnosis o ganser y ceilliau a oedd wedi lledu i’w stumog a’i ysgyfaint – newyddion a ddaeth yn “sioc enfawr” i’r teulu.

Roedd Bronwen yn siarad fel gwestai ar raglen Y Cyfweliad ar S4C, rhaglen sy'n fersiwn Gymraeg o’r gyfres The A-Talks (sydd hefyd yn cael ei adnabod fel The Assembly) - lle mae grŵp o 30 o ymholwyr awtistig, niwro-wahanol a/neu sydd ag anableddau dysgu yn holi person adnabyddus.

Yn ystod y sgwrs, mae Mair, sydd eisiau bod yn nyrs, yn gofyn i Bronwen am frwydr ddiweddar ei brawd bach gyda chanser. 

Dywedodd Bronwen Lewis: “O'dd e wedi dangos i ni fel teulu beth sy’n bwysig mewn bywyd - bod yn iachus, a teulu. Mae'n bwysig iawn i roi'r amser 'na."

Fe aeth Bronwen ymlaen i egluro, fel yr hynaf o dri, bod gwylio ei brawd bach yn mynd trwy’r driniaeth yn arbennig o anodd: “Pan ti yw’r un henach, ti wastad moyn edrych ar ôl dy frawd bach.

“I glywed bod e'n mynd trwy salwch a wedyn wrth gwrs cafodd e driniaeth, a wedyn i weld e'n colli gwallt a colli lliw - o'dd hwnna'n anodd.

“Mae neb rili yn paratoi ti i weld brawd bach ti'n edrych yn llwyd a dim gwallt.”

Mae ei brawd bellach yn rhydd o ganser, ac mae Bronwen yn dweud ei bod hi wedi gwneud addewid iddo i fynd ag ef i wylio Eurovision – rhywbeth y mae’n ffan mawr ohono – a bod hynny wedi rhoi nod clir iddo ymladd y cyflwr.

“O'dd hwnna fel amcan - ac aethon ni i'r Swistir i wylio Eurovision a chael lot o hwyl."

Fe fydd y cyfweliad llawn i'w weld ar S4C ar nos Fawrth 13 Ionawr am 21.00.