Bydd cylchgrawn materion cyfoes Barn yn cynnig recordiadau o'u herthyglau i bobl â nam golwg.

Cafodd cylchgrawn misol Barn ei sefydlu yn Sir Gâr yn 1962 ac ers hynny mae mwy na 500 o rifynnau wedi cael eu cyhoeddi.

Mae'r cylchgrawn bellach yn awyddus i sicrhau bod eu cynnwys ar gael i bobl sy’n ddall, yn rhannol ddall, neu’n wynebu heriau gyda darllen. 

Daeth egin y syniad i leisio'r erthyglau gan aelodau o fwrdd y cylchgrawn ar ôl iddyn nhw gysylltu gyda rhai tanysgrifwyr yn ddiweddar.

"Be' natho ni sylweddoli oedd bod nifer o bobl wedi bod yn tanysgrifio i Barn ers y dechrau un nôl yn y 60au yn dal i danysgrifio allan o ryw deyrngarwch i’r cylchgrawn, ond methu darllen y cylchgrawn bellach oherwydd eu bod nhw’n ddall neu’n rhannol ddall," meddai Eiry Miles, cyd-gadeirydd y bwrdd.

"Roedden ni’n meddwl bod o’n drueni mawr bod nhw methu mwynhau’r cylchgrawn ar ôl dangos gymaint o gefnogaeth tuag at y cylchgrawn.

"Felly, meddylion ni y bydde hi’n braf gallu cynnig dewis arall i bobl a bod modd iddyn nhw wrando ar y cylchgrawn a'i mwynhau mewn fformat newydd."

Er mwyn recordio'r erthyglau, mae'r cylchgrawn yn cydweithio gydag elusennau Cymdeithas y Deillion ym Mangor a Llyfrau Llafar yng Nghaerfyrddin.

Y bwriad ydi bod awduron yr erthyglau yn lleisio eu herthyglau eu hunain, gyda thanysgrifwyr yn derbyn y recordiadau ar ffurf CD neu atodiad e-bost.

Image

Yn ôl Ms Miles, mae'r fenter newydd yn rhan o ymroddiad i wneud Barn yn hygyrch ac yn gynhwysol i bawb. 

"Mae pobl yn hoffi derbyn gwybodaeth mewn ffurf wahanol ac mae anabledd dysgu, fel dyslecsia, yn gwneud hi'n anodd i bobl fwynhau darllen hefyd," meddai.

"Felly mae’n bwysig iawn ceisio cynnig y gwasanaeth yma fel bod pobl yn gallu mwynhau a gwerthfawrogi cynnwys Barn, ond yn bennaf oll i bobl â nam golwg a phobl sydd wedi bod yn ffyddlon iawn i’r cylchgrawn dros y blynyddoedd ac sy’n awyddus i barhau i fwynhau’r cylchgrawn. 

"Ddyle eu hanabledd a’u problemau golwg nhw ddim eu rhwystro rhag mwynhau cynnwys y cylchgrawn a pharhau i ymddiddori mewn materion cyfoes."

Ychwanegodd: "Mae'n bwysig bod pobl ddim y cael eu torri allan o fod yn rhan o be' sy'n digwydd yn y byd, a dysgu a thrafod materion cyfoes."

Mae'r cylchgrawn wedi recordio erthyglau o rifyn Rhagfyr-Ionawr i’w darparu mewn fformat sain a’u rhyddhau ar yr un pryd â’r rhifyn dwbl tymhorol. 

O’r rhifyn hwn, bydd Meg Elis yn bwrw golwg dros lên a llyfrau 2025, Elin Llwyd Morgan yn trafod hysbysebion Nadolig, a Beca Brown yn myfyrio ar unigedd. 

Bydd Elinor Wyn Reynolds yn trafod rhaglenni teledu’r Nadolig, tra bydd Huw Griffiths yn amlinellu ei bryderon am raglen Academi Seren Llywodraeth Cymru. 

Bydd y rhifyn hefyd yn cynnwys stori arbennig wedi'i lleisio gan yr actor Andrew Teilo.