Mae cyn ŵr a gwraig o'r de orllewin wedi eu carcharu am gyflenwi cyffuriau ar raddfa fawr yn ardal Abertawe a Rhydaman.

Fe wnaeth Phillip Jones, 44 oed, o Frynhyfryd, Abertawe, a Lisa Regan, 53 oed, o Borthfedd, Abertawe, wyngalchu eu henillion anghyfreithlon drwy gaffi ym Mlaenymaes.

Cafwyd hyd i luniau ar ffonau symudol yn dangos Phillip Jones yn torri cilogram o gocên.

Cafodd Regan ei harestio gan swyddogion ar ôl iddi lanio mewn maes awyr.

Plediodd Jones yn euog i gyflenwi cocên, dau gyhuddiad o feddu ar gyffuriau gyda'r bwriad o gyflenwi cocên, cuddio eiddo troseddol a gyrru tra dan waharddiad yn Llys Ynadon Abertawe ym mis Hydref.

Plediodd Regan yn euog i gyflenwi cocên, meddu ar gocên gyda'r bwriad o'i gyflenwi a chuddio eiddo troseddol.

Cafodd Lisa Regan ei dedfrydu i saith mlynedd a phedwar mis yn y carchar.

Mae Phillip Jones wedi cael ei ddedfrydu i chwe blynedd ac wyth mis yn y carchar.

Mae Tracy Lewis, 54 oed, o Landybie, Sir Gaerfyrddin, a oedd yn prynu llawer iawn o gyffuriau gan Regan ac yn rhedeg ei fusnes cyffuriau ei hun yn ardal Rhydaman, hefyd wedi cael ei garcharu ar ôl pledio'n euog i nifer o droseddau cyffuriau.

Plediodd Lewis yn euog i gyflenwi cocên, crac cocên a chanabis, meddu ar gyffuriau gyda'r bwriad o gyflenwi cocên, meddu ar gocên a meddu ar eiddo troseddol (£1,937 mewn arian parod).

Mae wedi cael ei ddedfrydu i chwe blynedd yn y carchar.