Mae dau berson wedi cael eu harestio yn Abertawe ar amheuaeth o achosi niwed corfforol difrifol.

Dywedodd Heddlu De Cymru eu bod wedi cael eu galw i ddigwyddiad yn ardal Hafod y ddinas fore Sadwrn.

Mewn datganiad dywedodd y llu: "Mae swyddogion yn bresennol wedi digwyddiad yn ardal Siopau Brynmelin yn Hafod, Abertawe fore Sadwrn.

"Mae dau berson - menyw 28 oed a dyn 26 oed, y ddau o Abertawe - wedi cael eu harestio ar amheuaeth o achosi niwed corfforol difrifol."

Ychwanegodd y llu bod presenoldeb swyddogion yn parhau yn yr ardal.

Mae'r heddlu yn parhau i ymchwilio i'r digwyddiad.