Mae prif hyfforddwr Cymru Steve Tandy yn dweud bod angen i Gymru fod "yn gallach" yn yr amddiffyn yn erbyn De Affrica ddydd Sadwrn.

Dyma gêm olaf Cymru yng Nghyfres yr Hydref eleni, ac mae'r gêm ddydd Sadwrn yn cael ei chwarae y tu allan i’r ffenestr gemau rhyngwladol sydd yn golygu bod 13 o chwaraewyr sydd yn chwarae i glybiau y tu allan i Gymru wedi gadael y garfan.

Un fuddugoliaeth a dwy golled yw hanes Cymru yn y gyfres hyd yma, gyda'r unig fuddugoliaeth yn erbyn Japan.

Os fydd Cymru eisiau ennill eu gêm yn erbyn y Springboks ddydd Sadwrn fydd angen iddyn nhw fod ar eu gorau yn yr amddiffyn.

Ond fe fydd hynny'n dasg anodd gyda Chymruwedi ildio 36.8 o bwyntiau ar gyfartaledd yn 2025.

Hefyd mae Cymru wedi ildio 33 cic gosb yn eu gemau mis yma, gyda charden goch i Josh Adams a chardiau melyn i Ben Thomas, Tomos Williams, Taine Plumtree a Gareth Thomas.

Bydd angen i Gymru wella ar y record honno er mwyn gallu ymdopi gydag ymosod De Affrica, meddai Steve Tandy.

"Mae angen i ni fod yn gallach achos roeddem wedi treulio 10 munud wrth byst ein hunain yn amddiffyn penwythnos diwethaf," dywedodd.

"Mae'r dewrder ac ansawdd rydym wedi dangos wrth amddiffyn yn anhygoel, ond rydym eisiau gwneud hynny llai achos chi ddim yn gweld beth ni'n gallu gwneud ochr arall y cae."

Inline Tweet: https://twitter.com/NewyddionS4C/status/1993660023734706262

2018 oedd y tro diwethaf i Gymru ennill yn erbyn De Affrica yn y Stadiwm Principality.

Mae Cymru wedi ennill un o'r wyth gêm ers 2018, a hynny o un pwynt yn Bloemfontein yn 2022.

Dyw'r Springboks heb golli un o'u gemau mis yma, gyda buddugoliaethau yn erbyn Japan, Ffrainc, yr Eidal ac Iwerddon.

Mae Steve Tandy yn disgwyl her anodd ddydd Sadwrn, ac yn dweud bod gan wrthwynebwyr Cymru "balchder" yn eu ffordd o chwarae.

"Maen nhw'n gwybod yn union sut maen nhw'n chwarae, ond hefyd yn gallu addasu, er y rhan fwyaf o amser nad oes angen iddynt wneud," meddai.

"Mae ganddynt falchder yn eu ffordd o chwarae ac mae hynny'n gweddu i'w rhinweddau corfforol hefyd."

Mae De Affrica wedi sgorio 37 pwynt ar gyfartaledd yn eu gemau fis yma.

Ac mae disgwyl i bencampwyr y byd orffen gyda buddugoliaeth ddydd Sadwrn, tra bod Cymru yn gobeithio cadw'r sgôr yn barchus.