Mae’r ddylanwadwraig Tennessee Thresher wedi ymddiheuro ym mhennod ddiweddaraf ei phodlediad ‘Punchin’ ar ôl i'w sylwadau am Gymru greu ton o ymateb chwyrn ar gyfryngau cymdeithasol.

Mewn pennod flaenorol o’i phodlediad, dywedodd y fenyw 25 oed nad oedd hi’n credu y dylai Cymru gael lle yng Nghwpan pêl-droed y Byd, ac y dylai Cymru a Lloegr gystadlu fel un tîm.

Wedi iddi dderbyn yr ymateb, mae hi bellach wedi ymddiheuro gan egluro nad oedd hi'n gwybod digon am hanes Cymru.

“Doeddwn i ddim yn gwybod fy hanes yn ddigon da pan oeddwn i'n siarad am y sefyllfa,” meddai.

“Dw i wedi dysgu llawer am hanes Cymru yn yr wythnos ddiwethaf” dywedodd ar bennod ddiweddaraf o’i phodlediad.

“Mae gen i ddilynwyr, ac mae’r hyn dw i’n ei ddweud yn cael argraff, a dw i’n gallu dylanwadu ar farn pobl eraill.

“Dwi eisiau ymddiheuro i unrhyw un o Gymru yr ydw i wedi eu siomi. Dwi’n credu yn gryf nawr bod gan Gymru bob hawl i fod yng Nghwpan y Byd a phob hawl i fod yn wlad ei hunan.”

Yn wreiddiol dywedodd Miss Thresher ei bod hi’n credu y dylai Cymru a Lloegr ymuno a’i gilydd.

“Dwi yn edrych ar Gymru ac yn meddwl bod Cymru yn rhan o Loegr” meddai yn ystod y drafodaeth sydd bellach wedi’i gwylio dros 500,000 o weithiau ar y cyfryngau cymdeithasol.

Yn dilyn yr ymateb chwyrn, fe wnaeth dylanwadwyr eraill ymuno â’r drafodaeth gyda seren y rhaglen Traitors, Elen Wyn yn dweud “mae Cymru wedi bod yn wlad ei hun am filiynau o flynyddoedd.

“Mae dweud y dylai Cymru fod yn rhan o Loegr yn dileu diwylliant cyfan, cenedl o bobl sydd wedi ymladd yn heddychlon ac yn wleidyddol i gadw ein hunaniaeth yn fyw."