Fe gafodd digwyddiad ei gynnal yng nghanolfan M-SParc ym Môn nos Iau i gofio am ddyn ifanc o Wynedd a fu farw mewn damwain ym Malta ym mis Gorffennaf eleni. 

Roedd Kieran Thomas Hughes, 25 oed, ar wyliau gyda'i ffrindiau pan syrthiodd oddi ar falconi mewn gwesty ar yr ynys ar 11 Gorffennaf.

Wedi iddo raddio o Brifysgol Bangor gyda gradd mewn Cyfrifiadureg, Kieran oedd aelod cyntaf Academi Sgiliau M-SParc ac fe dreuliodd gyfnod fel Datblygwr Meddalwedd yno cyn mynd ymlaen i weithio i gwmnïau Haia a Capventis fel peiriannydd meddalwedd.

Kieran hefyd oedd Arloeswr Ifanc y Flwyddyn cyntaf M-SParc. 

Cafodd digwyddiad ei drefnu yn M-SParc nos Iau, oedd yn cynnwys Den y Dreigiau, sef noson o rwydweithio a thrafodaethau gydag entrepreneuriaid arloesol. 

Ond roedd y digwyddiad hefyd yn gyfle i goffáu Kieran, gan ddyfarnu pwy oedd Arloeswr Ifanc y Flwyddn eleni a dyfarnu Cadair Goffa Kieran Thomas Hughes am y tro cyntaf.

Image

Dywedodd tad Kieran, Alan Hughes, wrth Newyddion S4C: "Bechod bo’ ni yma. Mae o’n drist be’ sy’ ‘di digwydd, ond dwi’n dad balch iawn.

"Ma’ hi ‘di bod yn fraint ac anrhydedd cael cymryd rhan yn be’ sy’ ‘di digwydd heno."

Ychwanegodd Alan: "Oedd Kieran yn hogyn annwyl, cariadus iawn o hyd wedi bod efo diddordeb mewn cyfrifiaduron, wedi gweithio’n galed trwy y brifysgol, a wedi cael dod i M-SParc, dod i’r academi a wedyn wedi dechra’ gwaith o ddifri efo cwmni o Iwerddon. 

"Dim ond wedyn ‘dan ni ’di deall pa mor dda oedd o wrth ei waith, a be’ oedd o wedi gyflawni yn yr amser yna, amser weddol fyr, ond yn arwain y maes yn lle oedd o’n gweithio."

Image

Pryderi ap Rhisiart ydy Rheolwr Gyfarwyddwr M-SParc, ac roedd yn cydweithio yn agos gyda Kieran.

Dywedodd wrth Newyddion S4C: "Mae o wedi bod yn ddigwyddiad chwerwfelys ag oedd meddwl amdana fo yn hynod o anodd, ond oeddan ni yn benderfynol o gael llwyfan haeddiannol i ddathlu rywun oedd yn arbennig iawn i ni yma yn M-SParc.

"Ein cymuned ni, pobl ni yma, busnesa ‘ma, pawb oedd wedi cael y fraint o’i adnabod o, pawb oedd wedi cael y fraint o’i adnabod o, a felly ma’n teimlo’n haeddiannol bo’ ni ‘di cael 15 busnes egnïol, arloesol yma ac wedi cael toriad yn y canol i goffáu person mor arbennig â Kieran Hughes."

Roedd ganddo feddwl mawr o Kieran, meddai. 

"Dwi'n gweithio efo gymaint o bobl ifanc a mae o'n fraint i gael gwneud ond oedd Kieran wir ar lefel arall. Yn dalentog ond wedyn yn gallu backio hwnna fyny efo personoliaeth cynnes, egni a tynnu coes, rhywun oedd yn braf iawn i fod yn ei gwmni o a fyddan ni yn ei golli fo," meddai. 

Image

Roedd Kieran yn arloeswr ifanc, ac mae ei dad, Alan, yn credu ei fod yn hollbwysig fod pobl ifanc yn cael y cyfle i arloesi, a hynny yn eu milltir sgwâr.

"Dwi’n meddwl bod o’n hanfodol bwysig bod pobl ifanc heddiw ‘ma yn cael y cyfle, ond bo’ nhw’n deall hefyd bod ‘na gyfle a bod cymorth iddyn nhw fynd ymlaen yn pa yrfa ma’ nhw’n ddewis felly a fa’ma ‘di’r lle i neud o," meddai Alan.

Kieran oedd enillydd cyntaf Arloeswr y Flwyddyn M-SParc, ac fe gafodd ei gadeirio am ei ddoniau.

Roedd yr union gadair honno yn rhan o'r digwyddiad nos Iau. 

Bellach mae wedi ei henwi yn Gadair Goffa Kieran Thomas Hughes, a Guto Gwilym Evans o'r Felinheli oedd yn deilwng o'r gadair eleni.

Image

Dywedodd Guto wrth Newyddion S4C: "Ma’ cael y fraint o gael  y gadair yma er coffa Kieran yn anhygoel rili."

Ychwanegodd Guto ei fod yntau hefyd yn teimlo fod hi'n bwysig i bobl ifanc gael y cyfle i arloesi.

"Dwi’n meddwl ma’n bwysig iawn, yn enwedig efo dyddia yma lle ma’ gymaint o stiwdants lleol yn gadael a mae o’n bechod rili ‘chos ti’n colli gymaint o dalent fel ‘na so ma’r ffaith bod digwyddiadau fel ‘ma yn gallu digwydd yn cadw pobl fel ‘na."

Ychwanegodd Alan Hughes: "Gweld gŵr bonheddig ifanc yn dilyn ôl-troed Kieran a gobeithio fedrith o fynd i’r un uchelder â nath Kieran."

Dywedodd Pryderi ap Rhisiart: "O'dd o'n hynod braf i gadeirio Guto heno, haeddiannol iawn, iawn. I eistedd yn y fath gadair, a dilyn ôl-troed rywun fel Kieran, ma' Guto yn llawn haeddu.

"Y cylch cyfan 'na yn cau... 'dan ni 'di cadeirio Kieran yn y gadair yna ag o'dd hi'n fraint cael gwneud hynny ag i gael dilyn i fyny rwan, emosiynol iawn ond breintiedig iawn i gael bod yn rhan ohona fo."

Fe roddodd deyrnged er cof am Kieran yn y digwyddiad nos Iau, ac roedd hynny yn golygu llawer i Alan Hughes. 

"O'dd y deyrnged heno 'ma yn arbennig o dda, yn dod â lot o gysur, ac yn gweld gymaint o feddwl oedd gan bobl o Kieran," meddai.

"‘Dan ni’n methu Kieran bob dydd, ma’ ‘na dwll anferth o hiraeth a methu fo."