Roedd Mr Fiddler yn 19 oed pan ddanfonodd danciau a milwyr i draethau Normandi ar D-Day.

Dywedodd ei fod yn "falch iawn" o dderbyn y fedal, gan ddisgrifio'r digwyddiad fel "anrhydedd fawr yn wir".

Y Legion d'Honneur yw anrhydedd uchaf Ffrainc, a sefydlwyd gan Napoleon ym 1802.

Yn 2014, penderfynodd llywodraeth Ffrainc gydnabod pob cyn-filwr D-Day gyda'r anrhydedd i ddiolch am eu hymdrechion i ryddhau Ffrainc ym 1944.

Yn ystod D-Day, gweithiodd Mr Fiddler fel prif gynorthwyydd cyflenwi ar long glanio tanciau, a'i waith oedd cludo tanciau a chyflenwadau ar draws y Sianel i draethau Normandi.

Gwasanaethodd hefyd ar HMS Holmes, oedd yn gweithredu mewn confois ag ar batrôl i warchod yn erbyn llongau tanfor yn yr Iwerydd, Sianel Lloegr a Môr y Gogledd.

Cyflwynwyd yr anrhydedd iddo gan Helene Treheux-Duchene, llysgennad Ffrainc i'r DU.

Dywedodd Ms Treheux-Duchene: “Mae'n anrhydedd fawr i mi gydnabod a mynegi diolchgarwch ein gwlad i arwr a helpodd i ryddhau Ffrainc.

“Roedd fy ngwlad yn ffodus i allu dibynnu ar gefnogaeth ei phartner agosaf, y DU, a phobl ddewr Prydain a ymladdodd dros ein gwerthoedd cyffredin, rhyddid, democratiaeth a heddwch.

“Mae'r seremoni wobrwyo hon yn gyfle i gofio'r cyfeillgarwch anorchfygol rhwng ein dwy genedl.

“Trwy'r wobr hon, mae Ffrainc eisiau anrhydeddu John Fiddler fel yr enghraifft berffaith o unigolyn sy'n haeddu ein diolchgarwch diddiwedd.”

Dywedodd Mr Fiddler: “Diolch, rydych chi i gyd yn bobl garedig iawn, diolch yn fawr iawn.”

Llun: ITV Cymru