Mae bod yn rhan o hysbyseb teledu Nadolig wedi golygu bod John Pierce Jones wedi cael "criw o wylwyr gwahanol sydd yn fy adnabod i".

Mae'r actor yn chwarae rhan taid yn hysbyseb teledu Tesco.

Cyfres o hysbysebion yw'r rhain sydd yn rhoi ciplun o olygfeydd teuluoedd ar draws Prydain.

"Mae'r hysbysebion Nadolig ma fel pantomeim mewn ffordd, mae yn rhan o fywyd adloniannol Nadolig," meddai John Pierce Jones wrth Heno.

Yn yr hysbyseb y mae John Pierce Jones a'r actores Lois Elenid yn actio ynddi mae 'na ffrae deuluol wedi bod a thensiwn wedi hynny.

"Dwi'n actio hen daid blin sydd yn ceisio rheoli pawb ac yn difetha'r Nadolig!" meddai. 

Image

Golygfeydd sydd yn gyfarwydd i ni gyd yw'r rhain meddai'r actores Lois Elenid oedd yn arfer chwarae'r cymeriad Tammy yn y gyfres Rownd a Rownd.

"Typical golygfeydd petha' sy'n digwydd dros 'Dolig, pobl yn ffraeo a petha' yn mynd yn wrong a mae o'n digwydd bob blwyddyn," meddai.

Yn ôl John Pierce Jones mae gwneud yr hysbyseb wedi golygu ei fod o wedi cael pobl yn stopio i siarad efo fo.

"Be sy 'di bod yn dda ydy dwi di bod ar ffilmiau, C'mon Midffîld a rhywbeth felly, 'da ni di bod yn neud petha' Nadoligaidd sydd wedi bod yno fo. 

"Ond ma hwn yn dod a criw o wylwyr gwahanol sydd yn fy adnabod i. 

"Ma' pobl ar y stryd lle dwi'n aros yma yn Gaerdydd, ma' pawb yn fy nabod i, 'Haia i so you last night,' sy'n beth gwahanol iawn iawn, 'How's Tesco going?' "

I Lois Elenid mae actio yn yr hysbyseb wedi gwneud iddi ddeall pa mor bwysig yw hysbysebion Nadolig i nifer.

"Dwi'n meddwl o'n i heb sylweddoli bod pobl yn edrych ymlaen ac yn aros i weld hysbysebion 'Dolig," meddai.

"Mae'n neis gweld bod pobl yn joio nhw." 

Llun: Hysbyseb Nadolig Tesco