Mae Heddlu'r De yn ymchwilio i gyfres o fyrgleriaethau mewn busnesau yn ardaloedd Treganna a Phontcanna, Caerdydd.

Dywedodd llefarydd fod swyddogion yn "adolygu cyfleoedd fforensig, yn siarad â thystion, ac yn adolygu teledu cylch cyfyng, er mwyn nodi ac arestio'r rhai sy'n gyfrifol."

Dywedodd y Prif Arolygydd Stuart McDean, o Heddlu De Cymru: “Mae bod yn ddioddefwr byrgleriaeth, boed yn eich cartref, eich busnes, neu ble rydych chi'n gweithio yn brofiad trawmatig ac rydym yn gweithio'n galed i roi stop ar y cynnydd diweddar hwn mewn byrgleriaethau masnachol.

“Rydym yn credu bod un neu ddau o bobl yn gyfrifol oherwydd y tebygrwydd yn y troseddau.

“Gofynnwn i bobl fod yn wyliadwrus o unrhyw un a welir yn loetran o gwmpas busnesau neu safleoedd manwerthu yn ystod oriau mân y bore.

“Os gwelir unrhyw un yn ymddwyn yn amheus, ffoniwch yr heddlu ar unwaith ar 999.”