Mae’r Swyddfa Dywydd wedi cyhoeddi rhybudd melyn am law trwm i ran helaeth o'r de a'r gorllewin yr wythnos hon.  

Fe fydd y rhybudd mewn grym rhwng 07.00 fore dydd Mawrth a 23.59 yr hwyr. 

Mae’r Swyddfa Dywydd yn rhybuddio y gallai rhai mannau gael eu heffeithio gan lifogydd erbyn prynhawn dydd Mawrth. 

Mae ‘na beryg y gallai cyflenwadau pŵer gael eu heffeithio gan y tywydd garw hefyd. 

Fe all y tywydd garw achosi oedi ar y ffyrdd ac ar drafnidiaeth gyhoeddus yn ogystal.

Fe fydd y rhan fwyaf o lefydd yn y de, y canolbarth a'r gorllewin yn gweld tua 30-50mm o law ddydd Mawrth, gyda rhai llefydd ar dir uwch yn profi hyd at 60-80mm o law. 

Mae’n bosib y bydd yn rhaid ymestyn y rhybudd ddydd Mercher os fydd y tywydd gwlyb yn parhau nos Fawrth. 

Pa ardaloedd fydd yn cael eu heffeithio?

Fe fydd y rhybudd melyn am law mewn grym yn yr ardaloedd isod:

• Abertawe

• Blaenau Gwent

• Bro Morgannwg

• Caerdydd

• Caerffili

• Casnewydd

• Castell-nedd Port Talbot

• Ceredigion

• Merthyr Tudful

• Pen-y-bont ar Ogwr

• Powys

• Rhondda Cynon Taf

• Sir Benfro

• Sir Fynwy

• Sir Gâr

• Torfaen