Mae athletwraig o Ynys Môn wedi dweud bod y profiad o ennill medal aur annisgwyl yng Ngemau’r Ynysoedd yn un “anhygoel”.

Fe enillodd Beca Bown y ras 1,500m, ar ôl rhedeg ei amser cyflymaf y tymor hwn, gan fynd o’r 3ydd safle i’r cyntaf yn y lap olaf.

Mae Ynys Môn bellach wedi ennill dwy fedal aur yn yr athletau ac un fedal efydd mewn gymnasteg yn y cystadlaethau ar Ynysoedd Erch (Orkney).

Fe enillodd Ffion Roberts y ras 400m ac fe gafodd Calla Woodcock fedal efydd ar y trawst gymnasteg.

Dyma oedd yr ail dro i Beca Bown gystadlu ar ôl gorffen ychydig y tu allan i’r medalau ddwy flynedd yn ôl yng Ngemau Ynysoedd Ynys y Garn (Guernsey). 

“Mae’n dal yn sioc,” meddai. “Doeddwn i ddim yn disgwyl ennill, ond rwy’n hapus iawn gyda sut aeth y ras. 

“Roedd y sŵn yn anhygoel. Dydw i ddim wedi profi rhywbeth fel ‘na o’r blaen. 

“Roedd y gefnogaeth i gyd yn anhygoel ac fe wthiodd fi drwodd yn y diwedd. Dydw i dal ddim yn gallu ei gredu. 

“Fe wnaeth Ffion yn anhygoel ddoe ac fe ysbrydolodd hi fi heddiw i wthio a mynd am aur.”

Dywedodd y byddai ei theulu “yn eu dagrau”.

“Mae fy nhad a fy nain a thaid yma. Mae fy mam a fy chwaer yn gwylio o adref. 

“Felly rydw i’n gyffrous i’w gweld nhw.”