Mae’r Cymro Gerwyn Price wedi ennill pencampwriaeth dartiau Meistri Gwlad Pwyl.

Roedd yr ‘Iceman’ ar dân yn Gilwice nos Sadwrn, wrth iddo lwyddo i sgorio cyfartaledd o dros 100 ym mhob un o’i tair buddugoliaeth yn y gystadleuaeth.

Ar ôl trechu Sebastian Bialecki o 6 chymal i 3, fe aeth ymlaen i ennill yn gyfforddus o 6-2 yn erbyn Chris Dobey yn rownd y chwarteri, 

Yna, fe lwyddodd y cyn-bencampwr y byd i ysgubo Rob Cross o’r neilltu yn y rownd gynderfynol drwy ennill 7-3.

Roedd y rownd derfynol yn erbyn Stephen Bunting yn gêm lawer iawn agosach, ond fe lwyddodd Price i sicrhau buddugoliaeth o wyth cymal i saith a hawlio’r darian.

Dyma oedd teitl cyntaf Price o’r flwyddyn, a’r tro cyntaf iddo gystadlu mewn rownd derfynol ers cynrychioli Cymru yn ffeinal Cwpan y Byd fis diwethaf.

Dywedodd Price wedi’r fuddugoliaeth ei fod wedi colli ei siwtces ar y daith drosodd i Wlad Pwyl.

“Fe gollais fy siwtces penwythnos yma. Dartiau newydd, esgidiau newydd, dillad newydd, a pherson newydd, felly dyma mi,” meddai.