AS Reform UK yn tynnu chwip ‘oddi wrtho’i hun’ tra bod ymchwiliad yn cael ei gynnal

05/07/2025
James McMurdock

Mae’r AS James McMurdock wedi tynnu chwip Reform UK oddi wrtho’i hun yng nghanol “honiadau sy’n debygol o gael eu cyhoeddi gan bapur newydd cenedlaethol”, meddai prif chwip y blaid.

Dywedodd Lee Anderson mewn datganiad ddydd Sadwrn fod yr honiadau yn erbyn Mr McMurdock “yn ymwneud â phriodoldeb busnes yn ystod y pandemig a chyn iddo ddod yn AS”.

Dywedodd Mr Anderson fod Mr McMurdock wedi “cytuno i gydweithredu’n llawn ag unrhyw ymchwiliad”.

Ychwanegodd Mr Anderson: “Rwyf wedi derbyn galwad heddiw gan James McMurdock sydd wedi fy nghynghori, fel Prif Chwip, ei fod wedi tynnu chwip y blaid oddi arno’i hun tra’n aros am ganlyniad ymchwiliad i honiadau sy’n debygol o gael eu cyhoeddi gan bapur newydd cenedlaethol."

Mae Mr McMurdock wedi cynrychioli De Basildon a Dwyrain Thurrock ers etholiad cyffredinol mis Gorffennaf diwethaf.

Enillodd y sedd o 98 pleidlais, gan guro Llafur a chymryd y sedd oddi wrth y Ceidwadwyr.

Dywedodd Mr McMurdock: “Roedd fy holl drafodion busnes bob amser wedi cael eu cynnal yn llawn o fewn y gyfraith ac yn unol â'r holl reoliadau”.

Cyhoeddodd y Sunday Times stori ddydd Sadwrn a honnodd fod dau fusnes sy'n gysylltiedig â Mr McMurdock wedi cymryd benthyciadau Covid-19 gwerth cyfanswm o £70,000 yn ystod y pandemig.

Mewn datganiad ar y cyfryngau cymdeithasol brynhawn Sadwrn, dywedodd Mr McMurdock fod newyddiadurwr wedi cysylltu ag ef.

“Fe wnes i gadarnhau i’r newyddiadurwr fod fy holl drafodion busnes bob amser wedi cael eu cynnal yn llawn o fewn y gyfraith ac yn unol â'r holl reoliadau a bod gweithwyr proffesiynol cymwys priodol wedi adolygu'r holl weithgaredd yn cadarnhau'r un peth," meddai.

 “Fel mesur rhagofalus, ac er mwyn amddiffyn ReformUK, rwyf wedi gofyn am atal y chwip dros dro.”

Newyddion diweddaraf

Mae'r wefan hon yn defnyddio cwcis i sicrhau eich bod chi'n cael y profiad gorau ar ein gwefan.