Mae cyn-Aelod Seneddol Llafur wedi dweud ei bod hi’n bwriadu sefydlu plaid newydd gyda Jeremy Corbyn.

Dywedodd Zarah Sultana ei bod hi’n ymddiswyddo o blaid Syr Keir Starmer a’n bwriadu “sefydlu a chyd-arwain plaid newydd” gyda chyn-arweinydd Llafur.

Roedd Ms Sultana yn un o saith AS a gollodd chwip y Blaid Lafur yr haf diwethaf wrth wrthwynebu'r cap budd-dal dau blentyn.

Cafodd pedwar o’r saith AS eu hadfer i’r blaid yn gynharach eleni ond nid oedd Ms Sultana yn eu plith.

Arweiniodd Mr Corbyn y Blaid Lafur o 2015 i Ebrill 2020, gan gamu i lawr ar ôl i’r blaid golli yn Etholiad Cyffredinol 2019. Cafodd ei wahardd o’r blaid yn 2020.

Mewn datganiad a gyhoeddwyd ar X, dywedodd Ms Sultana, sy'n cynrychioli etholaeth Coventry South, y byddai'r prosiect hefyd yn cynnwys "ASau annibynnol eraill, ymgyrchwyr ac actifyddion ledled y wlad".

Dywedodd fod "San Steffan wedi torri ond bod yr argyfwng go iawn yn ddyfnach" a bod y "system ddwy blaid yn cynnig dim byd ond dirywiad ac addewidion wedi torri".

Ychwanegodd: "Flwyddyn yn ôl, cefais fy atal gan y Blaid Lafur am bleidleisio i ddiddymu'r cap budd-dal dau blentyn a chodi 400,000 o blant allan o dlodi.

"Byddwn i'n ei wneud eto.”

Wrth ymateb i ddatganiad Ms Sultana, dywedodd llefarydd ar ran y Blaid Lafur: “Mewn 12 mis yn unig, mae’r Llywodraeth Lafur hon wedi rhoi hwb i gyflogau, wedi darparu pedwar miliwn o apwyntiadau ychwanegol gyda’r GIG, wedi agor 750 o glybiau brecwast am ddim, wedi sicrhau tri chytundeb masnach a phedwar toriad i gyfraddau llog gan ostwng taliadau morgais i filiynau.

“Dim ond Llafur all gyflawni’r newid sydd ei angen i adnewyddu Prydain.”