Mae teulu dyn o Gymru fu farw yn namwain awyren Air India yn galw ar Lywodraeth y DU i gynnig mwy o gefnogaeth.

Bu farw Akeel Nanabawa o Gasnewydd, ei wraig Hannaa Vorajee a'u plentyn pedair oed Sara yn y ddamwain dydd Iau diwethaf.

Fe gafodd Mr Nanabawa ei fagu yng Nghasnewydd, cyn symud i fyw i Sir Gaerloyw gyda’i deulu.

Un person yn unig oedd wedi goroesi o'r 242 person oedd ar yr awyren Boeing 787 Dreamliner a oedd newydd gychwyn ei thaith o Ahmedabad i faes awyr Gatwick.

Roedd 53 person o Brydain ymysg y meirw.

Mae teulu Akeel wedi teithio i India ac yn dweud nad oes cymorth iddyn nhw yno.

"Does dim arweiniad yma gan y DU, dim tîm meddygol, dim swyddogion arbennig yn yr ysbyty i helpu ni drwy hyn," meddai llefarydd ar ran y teulu.

"Rydym yn cael ein gorfodi i wneud apwyntiadau i weld staff conswlaidd sydd wedi eu lleoli 20 munud i ffwrdd mewn gwesty.

"I gyd tra bod ein hanwyliaid yn gorwedd heb eu cydnabod yn ffurfiol mewn ysbyty sydd heb ddigon o adnoddau."

Dywedodd aelod arall o'r teulu: "Nid ydym yn gofyn am wyrthiau - rydym yn gofyn am bresenoldeb, tosturi a gweithredu.

"Ar hyn o bryd, rydym ni'n teimlo ein bod ni ar ein pennau ein hunain."