Mae’r Swyddfa Dywydd wedi cyhoeddi rhybudd melyn ar gyfer stormydd mellt a tharanau i’r rhan fwyaf o Gymru ddydd Iau.

Bydd y rhybudd mewn grym o hanner nos nes 13:00 ar draws Cymru heblaw am rannau o ogledd y canolbarth a’r gogledd-ddwyrain.

“Bydd glaw trwm a stormydd mellt a tharanau yn symud tua'r gogledd, gan arwain o bosibl at rywfaint o darfu ar deithio mewn rhai ardaloedd,” meddai y Swyddfa Dywydd.

“Efallai y bydd rhai ardaloedd yn derbyn 10-20 mm o law mewn awr, a 30-40 mm mewn tair awr neu lai, gan arwain at aflonyddwch.

“Bydd gwyntoedd cryfion hefyd ar adegau, efallai hyd at 40-50 mya o amgylch y bryniau a'r arfordiroedd.”

Fe fydd yn effeithio ar y siroedd canlynol:

• Abertawe
• Blaenau Gwent
• Bro Morgannwg
• Caerdydd
• Caerffili
• Casnewydd
• Castell-nedd Port Talbot
• Ceredigion
• Conwy
• Gwynedd
• Merthyr Tudful
• Pen-y-bont ar Ogwr
• Powys
• Rhondda Cynon Taf
• Sir Benfro
• Sir Fynwy
• Sir Gaerfyrddin
• Torfaen
• Ynys Môn