Bydd rhaid i ymgeiswyr Reform yn etholiadau’r Senedd y flwyddyn nesaf gefnogi datganoli, yn ôl arweinydd y blaid Nigel Farage.

Holodd ITV Cymru a fyddai Mr Farage yn fodlon caniatáu ymgeiswyr “gwrth-ddatganoli” ar gyfer etholiad y Senedd.

Dywedodd na fyddai ac “wrth gwrs” y byddai angen i’w ymgeiswyr dderbyn nad oedd modd cael gwared ar ddatganoli yng Nghymru.

“Na, na - mae’r llong yna wedi hwylio yn llwyr,” meddai wrth raglen Sharp End. “Does yna ddim lle ar gyfer hyn.

“Rydyn ni wedi gweld datganoli ar draws sawl rhan o Loegr hefyd.

“Mae’n bryd i bawb yng Nghymru dderbyn - mae hyn wedi digwydd.

“Dyw’r cloc ddim yn mynd i gael ei droi yn ôl. Mae’n fater o sut ydan ni’n ei wneud orau.”

Bydd etholiad nesaf y Senedd ym mis Mai 2026, gyda nifer y seddi yn y Senedd yn cynyddu o 60 i 96.

Roedd arolwg barn a gyhoeddwyd gan ITV Cymru a Phrifysgol Caerdydd ym mis Mai yn rhoi Plaid Cymru ar y blaen ar 30%, gyda Reform ar 25%, a Llafur ar 18%.

Wrth ymweld â Phort Talbot ddydd Llun dywedodd Nigel Farage mai nod y blaid oedd “ail-ddiwydiannu” Cymru.

“Caeodd Llafur unig ffwrneisi gwneud dur craidd Cymru, rydym am eu hagor yn y tymor hir,” meddai.

“Rydym wedi dweud ac yn dweud eto ein bod yn credu ei bod yn well defnyddio glo Prydeinig ar gyfer dur Prydain na glo wedi'i fewnforio.”