Mae streiciau ym Mhrifysgol Caerdydd wedi cael eu canslo ar ôl addewid na fydd yna unrhyw ddiswyddiadau gorfodol eleni.

Fe wnaeth aelodau Undeb y Prifysgolion a Cholegau (UCU) gymeradwyo'r cynlluniau brynhawn Iau ar ôl trafodaethau â rheolwyr y brifysgol.

Fis Mawrth fe wnaeth aelodau’r UCU bleidleisio dros fynd ar streic am eu bod yn anfodlon â chynlluniau i gael gwared â channoedd o swyddi.   

Roedd disgwyl wyth dydd o streicio gan ddechrau ar 6 Mai.

Bydd ymgynghoriad ynghylch y toriadau mewn rhai adrannau yn parhau, ac mae disgwyl rhagor o fanylion ym mis Mehefin.

Roedd y brifysgol eisoes wedi dweud ei bod wedi gallu atal diswyddiadau gorfodol ar gyfer y flwyddyn galendr hon.

Dywedodd Joey Whitfield, Llywydd UCU Caerdydd: "Rydym yn falch iawn bod aelodau a staff UCU yn y brifysgol ddim yn wynebu bygythiad o ddiswyddo gorfodol.

"Rydyn ni’n parhau i fod yn bryderus am ddyfodol y brifysgol. Ond rydym yn croesawu'r newid mewn tôn ac yn edrych ymlaen at weithio'n agosach gyda'r brifysgol yn yr wythnosau nesaf."

'Sicrwydd'

Dywedodd un o gynrychiolwyr yr undeb, Joseph Healy wrth Radio Cymru bod popeth wedi mynd “yn lot rhy fast a dweud y gwir”. 

“Mae angen o leia’ chwe mis arall o drafod y peth o fewn y brifysgol er mwyn i ni gael amser i feddwl am y peth a dweud y gwir.

“Ni am sticio at beth y’n ni wedi dweud sef bo ni ddim am gymryd unrhyw weithredu diwydiannol yn y cyfnod yma tan ddiwedd 2025.

“Nid jest yn y flwyddyn academaidd yma ond mewn i’r semester nesa’ hefyd.

“Mae lot mwy o sicrwydd i bawb yn y brifysgol ond mae’r ansicrwydd yn dechrau eto ar ddiwedd y cyfnod yna.”