Mae dau ddyn o Abertawe wedi cael eu carcharu ar ôl i un ohonynt yrru yn beryglus a'r llall fygwth dioddefwr oedd gyda'i deulu â chleddyf samurai.

Roedd Stephen Harris, 29, o Uplands wedi gyrru Citroen Xsara Picasso ar Heol Llangyfelach, Treboeth am tua 18:20 ddydd Sul 20 Ebrill, gyda Lathan Gray, 27, o Fonymaen,  yn sedd y teithiwr.

Roedd olwynion cerbyd Harris wedi bod yn troelli yn yr unfan gan ddefnyddio'r brêc llaw yng nghanol ffordd brysur.

Yna fe wnaethon nhw ddilyn cerbyd aelod o’r cyhoedd a wnaeth eu herio, a oedd gyda’i bartner a’i fab saith oed yn seddi'r teithwyr.

Unwaith i'r dioddefwr stopio yn y garej Texaco gerllaw, stopiodd Harris ei gerbyd a rhwystro'r allanfa. 

Yna fe aeth Gray allan o'r cerbyd a chodi ei siwmper i ddangos carn cleddyf samurai oedd yn ei drowsus.

Roedd gan y cerbyd hefyd blât cofrestru ffug ac nid oedd ganddo yswiriant. Roedd Harris eisoes wedi’i wahardd rhag gyrru tan 2029.

Daeth swyddogion o hyd i’r cerbyd ychydig bellter i ffwrdd, ac fe wnaethon nhw hefyd ddarganfod cyllell gegin arall yn y cerbyd yn ogystal â morthwyl.

Cafodd y ddau eu cyhuddo a’u cadw yn y ddalfa cyn iddyn nhw bledio’n euog o flaen llys y bore wedyn.