Taoiseach Iwerddon fydd yr arweinydd rhyngwladol cyntaf i ymweld â phencadlys newydd Llywodraeth y DU ym Manceinion wrth iddo gyfarfod ag Andy Burnham ddydd Gwener.

Bydd Mr Burnham a Micheál Martin yn trafod cryfhau'r berthynas rhwng y DU ac Iwerddon yn eu cyfarfod swyddogol cyntaf ers i'r Prif Weinidog Prydeinig ddechrau yn ei swydd.

Mae disgwyl iddyn nhw ganolbwyntio ar amcanion cyffredin, gan gynnwys hybu masnach a diogelwch, cefnogi Wcráin a gweithio gyda'r Undeb Ewropeaidd, sydd ar hyn o bryd dan lywyddiaeth Iwerddon.

Daw'r ymweliad wedi i Mr Burnham groesawu Prif Weinidog Canada, Mark Carney, i Lerpwl ac Ysgrifennydd Cyffredinol NATO, Mark Rutte, i Rydychen yr wythnos hon.

Cyn y cyfarfod â Mr Martin, dywedodd Mr Burnham: "Dwi wrth fy modd yn cael croesawu'r Taoiseach fel yr arweinydd rhyngwladol cyntaf i ymweld â Rhif 10 y Gogledd – mae'n foment hanesyddol ac yn ddiwrnod balch i Fanceinion.

"Rhan mawr o bwrpas Rhif 10 y Gogledd yw creu cyfleoedd i bobl sy'n gweithio, ac mae ein partneriaeth gydag Iwerddon yn rhan allweddol o hynny, wrth i ni wella bywydau pobl yn ein dwy wlad.

"Mae cymaint y gallwn ei gyflawni gyda'n gilydd: o'n hymrwymiad cyffredin i Gytundeb Dydd Gwener y Groglith, i fasnach, gweithio gydag Ewrop a chefnogi Wcráin.

"Rydyn ni'n ffrindiau agos iawn, a dwi'n edrych ymlaen at gryfhau'r cyfeillgarwch hwnnw ymhellach."

Yn dilyn eu cyfarfod, bydd yr arweinwyr yn ymweld â chanolfan gymunedol Wyddelig leol i gwrdd â chynrychiolwyr o'r gymuned Wyddelig ym Manceinion Fwyaf.

Image

Daw'r cyfarfod ddyddiau yn unig ar ôl i Arlywydd yr Unol Daleithiau, Donald Trump, ddenu sylw rhyngwladol drwy ddweud y byddai wrth ei fodd yn gweld Iwerddon unedig yn ystod ymweliad â Dulyn.

Dywedodd Mr Trump y byddai Iwerddon unedig yn "digwydd yn y pen draw" a mai'r Taoiseach oedd "y gŵr iawn ar y pen yma" i wneud i hynny ddigwydd.

Iwerddon yw chweched partner masnachu mwyaf y DU, a'r llwybr awyr rhwng Dulyn a Llundain yw'r prysuraf yn Ewrop.

Prif lun: James Speakman/The Times/PA Wire