Bydd angladd y Pab yn digwydd am 10.00 ddydd Sadwrn meddai'r Fatican fore ddydd Mawrth.

Fe wnaeth cardinaliaid gwrdd ddydd Mawrth am y tro cyntaf ers marwolaeth y Pab Ffransis er mwyn trafod y trefniadau ar gyfer ei angladd.

Cyhoeddodd y Fatican i’r Pab farw ar fore Llun y Pasg yn 88 oed o strôc a phroblemau gyda'i galon.    . 

Roedd y Cardinaliaid sydd yn Rhufain ar hyn o bryd wedi'u gwahodd i gyfarfod am 8.00 (9.00 amser yr Eidal) i ddechrau cynllunio

Mae'r cardinaliaid hefyd wedi penderfynu y bydd corff y Pab yn cael ei symud i Fasilica Sant Pedr ddydd Mercher er mwyn caniatáu i’r cyhoedd roi teyrnged iddo cyn iddo gael ei gladdu.

Nos Lun, cafodd defod ei chynnal yn y Basilica yn datgan y farwolaeth yn swyddogol a chafodd gwasanaeth gweddi cyhoeddus ei gynnal am 19.30. 

Bydd y Pab nesaf yn cael ei ddewis gan Goleg y Cardinaliaid, sef uwch swyddogion yr Eglwys Gatholig, ond nid fydd hynny'n digwydd am 15 diwrnod arall. 

Ar hyn o bryd, mae 252 o gardinaliaid, ac mae 135 ohonyn nhw yn gymwys i bleidleisio dros y Pab newydd. 

Does dim hawl gan y rhai sydd dros 80 oed i gymryd rhan yn y bleidlais, ond mae modd iddyn nhw ymuno â'r drafodaeth i ddewis y Pab nesaf.  

Galaru

Naw niwrnod yw'r cyfnod swyddogol o alaru, wedi'r cyhoeddiad gan y Fatican. 

Yn yr Ariannin, sef gwlad enedigol y Pab, mae saith niwrnod o alaru wedi ei gyhoeddi.

Ffransis oedd y Pab cyntaf o Dde America. 

Bydd wythnos gyfan o alaru ym Mrasil, tra bod tridiau wedi eu cyhoeddi yn Sbaen. 

Yn Awstria, cafodd clychau eu canu mewn eglwysi ar hyd a lled y wlad am 17.00 nos Lun, cyn i offeren gael ei chynnal yng Nghadeirlan San Steffan yn Fienna nos Lun. 

Yn Lloegr a'r Alban, mae baneri'r undeb wedi eu gostwng i hanner mast mewn adeiladau brenhinol. 

Yn Ffrainc, canodd clychau Cadeirlan Notre Dame ym Mharis 88 o weithiau brynhawn Llun.