Mae Heddlu'r Gogledd wedi cyhoeddi fod corff dyn wedi cael ei ddarganfod oddi ar arfordir Caernarfon.

Derbyniodd yr heddlu adroddiadau yn oriau mân fore Iau fod dyn oedrannus o ardal Caernarfon wedi methu â dychwelyd i'w gartref. 

Dechreuodd yr ymgyrch i chwilio amdano gyda hofrennydd gwylwyr y glannau, yr uned drôn a swyddogion arbenigol yn bresennol. 

Cafodd corff y dyn ei ddarganfod yn oriau mân fore Iau yn y dŵr ger Pwynt Abermenai.

Dywedodd llefarydd ar ran Heddlu Gogledd Cymru: "Ychydig wedi hanner nôs ar ddydd Iau, 27 Mawrth derbyniodd swyddogion adroddiad fod dyn oedrannus yn ardal Caernarfon wedi methu â dychwelyd adref. 

"Ar 04:45 ar 27 Mawrth, fe gafodd corff dyn ei ddarganfod o'r dŵr gan Wylwyr y Glannau ger Pwynt Abermenai, Caernarfon. Mae teulu'r dyn a'r crwner wedi cael gwybod."