Mae cwest wedi dod i’r casgliad bod Cymro 28 oed wedi marw o anaf i’w ben ar ôl syrthio o feic modur yng Ngwlad Thai.

Bu farw Corey George Beavis o Landochau Fach, Bro Morgannwg drwy ddamwain ar ôl hollti ei benglog mewn gwrthdrawiad ffordd yn rhanbarth Kathu, Phuket ym mis Ionawr.

Dywedodd y crwner Graeme Hughes yn Llys Crwner Pontypridd ei fod wedi “ail-leoli i Wlad Thai.

“Ar 4 Ionawr roedd yn reidio beic modur yn Ardal Kathu, Phuket,” meddai.

“Credir ei fod wedi colli rheolaeth, ac wedi dod oddi arno. 

“O ganlyniad, fe wnaeth e ddioddef anaf difrifol i'w ben. Bu farw o ganlyniad i’r anaf yn y fan a'r lle.”

Wrth agor ei gwest yn flaenorol roedd y crwner wedi clywed bod ei feic modur wedi bwrw ochr y ffordd.

Ar ôl ei farwolaeth fe sefydlodd ei deulu ymgyrch JustGiving i ddychwelyd ei gorff i’r DU, gan godi dros £40,000. 

Wrth roi teyrnged iddo dywedodd ei deulu ei fod yn “gymeriad mawr gyda chwerthiniad heintus”.

“Fe wnaeth o fyw bywyd x10 tu hwnt i’w ddisgwyliadau,” medden nhw.