Mae cefnogwr Wrecsam yn gwella yn yr ysbyty ar ôl dioddef argyfwng meddygol yn ystod gêm ddydd Sadwrn.

Bu'n rhaid atal y gêm rhwng Wycombe Wanderers a Wrecsam am gyfnod wedi 77 munud er mwyn i staff meddygol a'r gwasanaethau brys ddelio â digwyddiad yn yr eisteddle, lle'r oedd cefnogwyr Wrecsam.

Dywedodd y clwb bod y cefnogwr wedi cael triniaeth ac fe adawodd y stadiwm mewn cyflwr sefydlog.

Cafodd y cefnogwr ei gludo i'r ysbyty mewn ambiwlans, a bellach mae'n gwella ar ôl cael triniaeth feddygol bellach.

Diolchodd y clwb i'r staff meddygol am ymateb yn gyflym, ac maen nhw wedi dymuno gwellhad buan i'r cefnogwr.

Enillodd Wrecsam 1-0 yn Wycombe, gan olygu bod y clwb yn ail, a thriphwynt o flaen Wycombe yn Adran Un.

Mae'r clwb yn gobeithio ennill dyrchafiad i'r Bencampwriaeth. Bydd y ddau dîm sydd yn gorffen yn gyntaf ac ail yn ennill dyrchafiad awtomatig.