Mae Heddlu'r Gogledd a'r Awdurdod Gweithredol Iechyd a Diogelwch (HSE) yn ymchwilio yn dilyn marwolaeth dyn ar fferm yn ardal Caergybi o Ynys Môn.

Digwyddodd y farwolaeth ar fferm yn Rhyd-wyn yng ngogledd orllewin yr ynys ddydd Mercher.

Mewn datganiad ddydd Iau, dywedodd yr heddlu eu bod yn cynnal ymchwiliad i'r farwolaeth ar ôl cael eu galw am 12:03 ddydd Mercher yn dilyn adroddiad am "ddigwyddiad" ar y fferm.

"Yn anffodus bu farw dyn a gafodd anafiadau yn y digwyddiad", meddai datganiad yr heddlu.

Mae ei berthynas agosaf a’r Crwner wedi cael gwybod, ac mae'r heddlu'n gweithio gyda’r Awdurdod Gweithredol Iechyd a Diogelwch i sefydlu amgylchiadau'r farwolaeth.

Wrth ymateb i'r newyddion, dyweodd y cynghorydd Llio Angharad Owen, sy'n cynrychioli'r ardal ar y cyngor sir: "Hoffwn rannu cydymdeimlad llwyr gyda theulu a ffrindiau'r sawl sydd wedi cael eu heffeithio yn y drychineb yma, sydd yn sioc enfawr i'r gymuned.

"Rwy'n diolch i'r gymuned am barchu sensitifrwydd a difrifoldeb y digwyddiad, rwy'n gwybod bod hwythau yn rhannu cydymdeimlad.

"Mae'n bwysig diolch hefyd i'r gwasanaethau brys am eu hymateb prydlon."