Mae beiciwr modur wedi marw yn dilyn gwrthdrawiad ger yr Wyddgrug ddydd Iau. 

Derbyniodd yr heddlu adroddiad am wrthdrawiad ar yr A494 yn Llanferres ychydig wedi 09:15.

Roedd y gwrthdrawiad rhwng beic modur Honda a fan Mercedes Sprinter.

Bu farw'r beiciwr modur yn lleoliad y ddamwain.

Mae ei deulu a'r Crwner wedi cael gwybod am ei farwolaeth.

Dywedodd y Ditectif Sarjant Katie Davies o Uned Ymchwilio i Wrthdrawiadau Difrifol Heddlu Gogledd Cymru: “Rydym yn cydymdeimlo â theulu a ffrindiau’r dyn ar yr adeg anodd yma.

“Rydym yn apelio am unrhyw dystion, neu unrhyw un a allai fod wedi bod yn teithio ar hyd yr A494 ychydig cyn y gwrthdrawiad ac a allai fod â lluniau camera cerbyd i gysylltu â ni.”

Mae’r ffordd yn parhau ar gau ond mae disgwyl iddi ail-agor yn fuan.