Mae dyn 19 oed o’r de wedi marw ychydig fisoedd yn unig ar ôl cael gwybod bod ganddo diwmor prin ar yr ymennydd. 

Roedd Jac Sexton o Aberdâr yng Nghwm Cynon wedi dechrau ar yrfa fel barbwr pan gafodd ei daro'n wael ym mis Hydref 2024. 

Pan aeth at y meddyg fe gafodd gam-ddiagnosis o haint ar y glust gan ei fod wedi dioddef gyda thwymyn y chwarrenau ('glandular fever') yn ystod yr haf blaenorol. 

Roedd ei symptomau yn golygu ei fod yn ymddangos yn feddw, ag yntau’n teimlo’n benysgafn gyda thrafferth i siarad yn eglur. 

Fe aeth Jac yn ôl at ei feddyg y diwrnod wedyn ac fe gafodd wybod y byddai'n cael sgan CT bythefnos yn ddiweddarach. 

Ond roedd ei symptomau yn parhau i waethygu ac ar ôl mynd i'r ysbyty ym Merthyr Tudful y diwrnod canlynol, fe gafodd Jac a’i fam wybod fod ganddo diwmor ar yr ymennydd. 

Roedd y canser mewn rhan o'i ymennydd fel nad oedd modd iddo gael biopsi. 

Roedd lleoliad y glioblastoma hefyd yn golygu nad oedd modd mynd i’r afael â’r tiwmor yn y ffordd arferol. 

Yn dilyn cyfnod yn yr ysbyty, bu farw Jac yn ei gartref wedi ei amgylchynu gan ei deulu ar 25 Chwefror.

Image

'Cymeriad'

Roedd ewythr Jac, Rhydian Sexton, 37 o Aberdâr, “fel tad iddo.” 

“Roedd Jac wedi cyffwrdd a gymaint o bobl yn ystod y misoedd diwethaf,” meddai. 

“Roedd y nyrsys yn ei alw ‘Sassy Jac.’ Er gwaethaf yr holl bethau yr oedd yn mynd trwyddo, roedd ganddo gymaint o gymeriad. 

“Dyna oedd yn ei gadw e’n brwydro am gyfnod mor hir. Yn ystod y pythefnos olaf, da ni wedi chwerthin gymaint yn y tŷ ac mae wedi bod yn arbennig. 

“Mae’r berthynas oedd da fe a’i deulu yn dweud y cyfan. Roedd yn hapus, dyna oedd y prif beth.” 

Image

Cafodd Jac chwe mis o radiotherapi a ddaeth i ben ar Noswyl Nadolig. 

Yn sgil y driniaeth fe gollodd y gallu i lyncu neu godi o’r gwely ac oherwydd hynny fe ddioddefodd argyfwng gan nad oedd modd iddo anadlu.

Ar 4 Ionawr roedd darn o fwyd, diod neu boer wedi mynd i mewn i'w bibell wynt ac i’w ysgyfaint gan olygu bod yn rhaid iddo gael llawdriniaeth ar frys a hynny yn ei gartref. 

Cafodd ei deulu eu rhybuddio y byddai Jac yn debygol o fod yn anabl pe bai'n goroesi. 

Ond pan ddeffrodd Jac, doedd dim anabledd o’r fath ganddo. 

“Dywedodd y meddygon nad oedden nhw erioed wedi gweld unrhyw beth fel hyn ers dros 30 mlynedd,” meddai Rhydian.

“Y nod nawr yw hyrwyddo stori Jac a chodi gymaint o arian ag a gallwn ni.”