Mae sawl ardal yng Ngwynedd a Chonwy wedi bod heb drydan am gyfnodau ar fore ddydd Gwener wrth i wyntoedd cryfion achosi trafferthion mewn mannau o Gymru.

Mae’r Swyddfa Dywydd wedi cyhoeddi rhybudd melyn am wynt i rannau o Gymru ddydd Gwener, gyda rhai hyrddiadau yn cyrraedd 60 i 70mya mewn rhai mannau.

Mae cwmni SP Energy Networks yn adrodd bod cartrefi mewn ardaloedd ym Mhen Llŷn, Llanberis, Penrhyndeudraeth, Tywyn a Chapel Curig heb drydan fore Gwener.

Mae Cyngor Gwynedd hefyd wedi cyhoeddi fod Ysgol Friars Uchaf ym Mangor hefyd wedi’i chau oherwydd y gwyntoedd cryfion.

Mae’r amodau yn cael effaith ar y ffyrdd yn ogystal, gyda chyfyngiadau cyflymder mewn lle ar Bont Britannia.

Mae cwmni Irish Ferries wedi cyhoeddi bod tair fferi rhwng Dulyn a Chaergybi wedi’u canslo ddydd Gwener oherwydd yr amodau garw.

Yn ôl Stena Line, mae’r fferi o Gaergybi i Ddulyn am 10.00 wedi’i ganslo ond fe fydd y gwasanaeth 19.30 yn parhau i redeg.

Fe fydd y rhybudd mewn grym rhwng 08:00 a 15:00, a bydd yn effeithio ar arfordir y gorllewin a siroedd y de yn bennaf.

Mae disgwyl i wyntoedd 50-60 mya daro arfordiroedd a bryniau agored Cymru, gyda rhai ardaloedd yn cael hyrddiau 70 mya am gyfnod.

Fe allai arwain at amodau teithio heriol ar ffyrdd, rheilffyrdd ac i deithwyr sy’n hedfan o feysydd awyr.

Gallai hefyd arwain at doriadau mewn cyflenwadau trydan i rai am gyfnod.

Rhybudd melyn

Dyma'r siroedd sy'n destun rhybudd melyn:

• Pen-y-bont ar Ogwr
• Caerdydd
• Sir Gaerfyrddin
• Ceredigion
• Conwy
• Gwynedd
• Ynys Môn
• Castell-nedd Port Talbot
• Sir Benfro
• Powys
• Rhondda Cynon Taf
• Abertawe
• Bro Morgannwg