Mae disgwyl i Borthladd Caergybi ail-agor yn llawn ym mis Gorffennaf wrth i waith pellach gael ei gynnal i atgyweirio difrod Storm Darragh.

Ddydd Llun daeth cadarnhad gan Stena Line, perchnogion y porthladd, eu bod yn cynllunio gwaith i adfer Terfynfa 3 dros y misoedd nesaf.

Mae'r cwmni'n amcangyfrif y bydd y derfynfa yn ail-agor ar 1 Gorffennaf 2025.

Fe gafodd yr holl wasanaethau fferi yn y porthladd eu canslo cyn cyfnod y Nadolig ar ôl i dywydd stormus ddifrodi'r seilwaith.

Bu oedi wrth ddosbarthu parseli ac fe gafodd miloedd o bobl oedd yn teithio adref ar gyfer y Nadolig eu heffeithio.

Cafodd gwaith i atgyweirio Terfynfa 5 ei gwblhau fis Ionawr, gan alluogi’r porthladd i agor yn rhannol ar 16 Ionawr gydag amserlen wedi’i haddasu.

Dywedodd llefarydd ar ran Stena Line: “Mae gwaith yn mynd rhagddo i sicrhau bod y Derfynfa yn dychwelyd i allu gweithredu’n llawn yn y modd mwyaf diogel ac effeithlon â phosib.

“Wrth edrych i'r dyfodol, rydym yn parhau i fod yn ymrwymedig i wella gwydnwch hirdymor Porthladd Caergybi a sicrhau ei ddyfodol cynaliadwy.”