Mae dyn 32 oed wedi'i gyhuddo o gynhyrchu gwerth miloedd o bunnoedd o ganabis yn Sir Gâr.

Cafodd Nurdin Hoxha ei arestio a'i gyhuddo o gynhyrchu'r cyffur dosbarth B ar ôl i Heddlu Dyfed Powys weithredu warant chwilio mewn cyfeiriad ar Hen Heol Llangynnwr yng Nghaerfyrddin ddydd Mawrth.

Ar ôl cael mynediad i'r eiddo, daeth swyddogion o hyd i 394 o blanhigion canabis gwerth tua £380,000.

Ymddangosodd Hoxha yn Llys Ynadon Llanelli ddydd Mercher ond cafodd yr achos ei symud i Lys y Goron.

Bydd yn parhau yn y ddalfa cyn ymddangos yn Llys Y Goron Abertawe ar 7 Mawrth.