Mae cwmni cynhyrchu Rondo Media wedi cyhoeddi cwrs awduron newydd i ddathlu 30 mlynedd o'r gyfres Rownd a Rownd.

Mae Rownd a Rownd yn gyfres ddrama boblogaidd wedi’i lleoli yng ngogledd Cymru sy’n dilyn hanes trigolion pentref dychmygol Glanrafon. 

Yn ôl Rondo Media, sy'n cynhyrchu'r gyfres, bwriad y cwrs pedwar mis yw "meithrin y genhedlaeth nesaf o awduron teledu Cymraeg".

Bydd ymgeiswyr llwyddiannus yn cymryd rhan mewn rhaglen rhan amser a fydd yn "ysbrydoli, addysgu a rhoi cyfle i leisiau’r dyfodol fireinio eu crefft".

Mae’r cwrs yn cynnwys: 

- Dosbarthiadau meistr dan arweiniad arbenigwyr yn y diwydiant sy’n cynnig technegau adrodd straeon a sgwennu ar gyfer y sgrin. 

- Mentora un-i-un gyda thiwtoriaid profiadol fydd yn rhoi arweiniad ac adborth ar hyd y ffordd. 

- Dysgu sut mae cynnig a chyflwyno syniadau i sianeli a chwmnïau cynhyrchu. 

- Cyflwyniad i ochr fusnes y diwydiant ffilm a theledu yng Nghymru.   

Mae’r rhaglen yn agored i unrhyw un sy’n llawn brwdfrydedd, creadigrwydd, ac sy’n credu bod ganddyn nhw syniadau ffres ar gyfer cyfresi teledu.  

Dywedodd Bedwyr Rees o Rondo Media bod y gyfres wedi bod yn "ganolog i feithrin talentau o flaen, a thu ôl i’r camera" dros y blynyddoedd.  

"Wrth i ni nodi’r garreg filltir hon, rydym ni'n awyddus i roi cyfle i’r genhedlaeth nesaf o ‘sgwennwyr ddatblygu eu crefft ymhellach," meddai.

Y dyddiad cau am geisiadau yw hanner dydd, dydd Llun 10 Chwefror 2025. 

Mae modd gwylio Rownd a Rownd ar S4C bob nos Fawrth a nos Iau am 8.25, ac ar S4C Clic a BBC iPlayer.