Mae Cymro oedd yn brif dyst yr erlyniad yn achos Lucy Letby wedi "newid ei feddwl ar achosion marwolaethau tri o'r babanod" yn ôl cyfreithwyr y cyn-nyrs. 

Dywedodd cyfreithwyr ar ran Lucy Letby eu bod wedi gofyn am yr hawl gan y Llys Apêl i apelio o'r newydd yn erbyn ei heuogfarnau. 

Cafodd y gyn nyrs ei dyfarnu'n euog o lofruddio saith o fabanod ac o geisio llofruddio saith arall ym mis Awst 2023.

Roedd yn gweithio yn uned newydd anedig Ysbyty Countess of Chester rhwng Mehefin 2015 a Mehefin 2016 pan ddigwyddodd y llofruddiaethau.

Roedd pump o'r babanod yn dod o Gymru.

Y cyn-ymgynghorydd paediatrig Dr Dewi Evans oedd y prif dyst ar ran yr erlyniad.

Ar ôl pori drwy filoedd o ddogfennau o Ysbyty Countess of Chester, roedd ei dystiolaeth yn ganolog i benderfyniadau'r rheithgor, a charcharu Letby.

Fisoedd yn ddiweddarach, cytunodd tri o uwch farnwyr y Llys Apêl bod dadansoddiad Dr Evans yn gwbl ddibynadwy.

Tro pedol

Wrth siarad mewn cynhadledd i'r wasg ddydd Llun, dywedodd y bargyfreithiwr Mark McDonald: "Roedd y prif resymau am apelio yn y gwrandawiadau blaenorol yn ymwneud â derbynioldeb tystiolaeth prif dyst yr erlyniad, Dr Dewi Evans, gan y rheithgor.

"Fe wnaeth yr amddiffyniad ddadlau ddwywaith yn yr achos y dylid diystyru tystiolaeth Dr Evans. Fe gafodd hyn ei wrthod gan farnwr yr achos. 

"Fe gafodd hyn ei ddadlau yn ddiweddarach yn y Llys Apêl, ac fe gafodd ei wrthod yma hefyd. 

"Yn rhyfeddol, mae Dr Evans bellach wedi newid ei feddwl ar achos marwolaeth tri o'r babanod: Baban C, Baban I a Babi P."

Mae Dr Dewi Evans wedi cael cais gan asiantaeth newyddion PA i wneud sylw.   

Ychwanegodd Mr McDonald fod Dr Evans bellach hefyd wedi ail-ystyried ei farn yn ymwneud â Babi C ac wedi ysgrifennu adroddiad newydd, adroddiad a gafodd ei roi i'r heddlu ganddo fisoedd yn ôl.

"Er gwaethaf sawl cais, dyw'r erlyniad dal heb roi'r adroddiad yma i'r amddiffyniad," meddai.

Dywedodd Mr McDonald hefyd y byddai'r "amddiffyniad yn dadlau nad yw Dr Evans yn dyst dibynadwy, ac o ystyried mai ef oedd prif dyst yr erlyniad, rydym ni'n dweud nad yw'r euogfarnau yn ddiogel."

Dywedodd llefarydd ar ran Gwasanaeth Erlyn y Goron: “Mae dau reithgor a thri barnwr llys apêl wedi adolygu llu o wahanol fathau o dystiolaeth yn erbyn Lucy Letby.

“Mae hi wedi’i chael yn euog ar 15 cyfrif gwahanol yn dilyn dau achos llys gwahanol.

“Ym mis Mai, gwrthododd y Llys Apêl ganiatâd Letby i apelio ar bob sail – gan wrthod ei dadl bod tystiolaeth arbenigol yr erlyniad yn ddiffygiol.”

Dywedodd llefarydd ar ran Gwasanaeth Erlyn y Goron: “Mae dau reithgor a thri barnwr llys apêl wedi adolygu llu o wahanol fathau o dystiolaeth yn erbyn Lucy Letby.

“Mae hi wedi’i chael yn euog ar 15 cyfrif gwahanol yn dilyn dau achos llys gwahanol.

“Ym mis Mai, gwrthododd y Llys Apêl ganiatâd Letby i apelio ar bob sail – gan wrthod ei dadl bod tystiolaeth arbenigol yr erlyniad yn ddiffygiol.”