Mae awyren oedd yn cludo corff Alex Salmond wedi dychwelyd i'r Alban lle'r oedd ei deulu'n aros gerllaw iddi lanio.

Bu farw Mr Salmond o drawiad ar y galon mewn cynhadledd yng Ngogledd Macedonia y penwythnos diwethaf.

Fe wnaeth yr awyren a gafodd ei thalu am gludo corff Mr Salmond gan y dyn busnes Syr Tom Hunter lanio ym maes awyr Aberdeen brynhawn ddydd Gwener.

Roedd ei deulu ac arweinydd Plaid Alba, Kenny MacAskill yn aros yn y maes awyr cyn i'r corff gael ei hebrwng i ffwrdd mewn hers.

Mae cynlluniau mewn lle ar gyfer angladd teuluol yn ogystal â gwasanaeth goffa cyhoeddus.

Fe wnaeth cyn Aelod Seneddol yr SNP a chadeirydd Plaid Alba, Tasmina Ahmed-Sheikh orchuddio arch Mr Salmond gyda baner yr Alban wrth iddi gael ei thynnu o fan ar y tarmac yng Ngogledd Macedonia cyn yr hediad i'r Alban.

Image

'Cysur'

Dywedodd Syr Tom Hunter ddydd Iau ei fod yn bwysig i gorff Mr Salmond dychwelyd i'w deulu.

“Er ei fod ef a minnau’n anghytuno ar rai o’i uchelgeisiau, cysegrodd Alex Salmond ei fywyd i’r Alban a phobl yr Alban," meddai,

"Roedd yn bwysig iawn i'w deulu ac roedd yn haeddu urddas a phreifatrwydd wrth ddychwelyd i gartref ei enedigaeth."

Dywedodd Mr MacAskill, a gamodd i mewn ar ôl marwolaeth Mr Salmond i gymryd yr awenau fel arweinydd dros dro Plaid Alba bod teulu Mr Salmond yn ddiolchgar am y gefnogaeth maen nhw wedi ei dderbyn.

“Mae’r teulu’n hynod ddiolchgar am y gefnogaeth sy’n cael ei ddarparu gan sicrhau awyren breifat i ganiatáu corff Alex i ddod adref i'r Alban.

“Mae’n dod â llawer o gysur i Moira ac aelodau eraill o’r teulu o wybod y bydd adref gyda nhw."

Llun: PA