Mae ymchwiliad gan Newyddion S4C wedi darganfod bod y pedoffeil Neil Foden wedi ei gyflogi fel pennaeth tra'r oedd yr achos llys yn ei erbyn yn mynd yn ei flaen.

Roedd yn dal yn ei swydd ac yn gyflogedig gan Gyngor Gwynedd hyd at ddiwrnod olaf mis Ebrill eleni, pan ymddiswyddodd o'i waith.

Roedd ei achos yn Llys y Goron yr Wyddgrug wedi dechrau ar 22 Ebrill.

Cafodd Foden ei garcharu am 17 o flynyddoedd ddechrau mis Gorffennaf ar ôl ei gael yn euog o gamdrin pedair merch dros gyfnod o bedair blynedd.

Yn dilyn ei achos llys ar 15 Mai, fe wnaeth Newyddion S4C anfon cais o dan y Ddeddf Rhyddid Gwybodaeth yn gofyn am wybodaeth oedd gan Gyngor Gwynedd am Mr Foden, ei gyflogaeth a chwynion amdano.

Mewn ymateb i'r cais hwnnw ddydd Llun, dywedodd Cyngor Gwynedd fod y pennaeth wedi ymddiswyddo o'i swydd fel pennaeth ar Ysgol Friars ym Mangor wythnos ar ôl i'r achos llys ddechrau.

Mae Bwrdd Diogelu Gogledd Cymru yn cynnal Adolygiad Ymarfer Plant annibynnol i achos Neil Foden ar hyn o bryd.

Mae disgwyl i’r adolygiad dan gadeiryddiaeth Jan Pickles gael ei gynnal am dros chwe mis cyn cael ei gyflwyno i Lywodraeth Cymru.

Fe fydd yn rhaid i Neil Foden dreulio o leiaf dwy rhan o dair o'i ddedfryd o dan glo.

Wrth ei ddedfrydu ym mis Gorffennaf, fe ddisgrifiodd y Barnwr Rhys Rowlands Neil Foden fel cymeriad "gormesol a bombastig" oedd gyda "chyfrinach warthus - obsesiwn rhywiol gyda merched ifanc bregus yn eu harddegau."

Roedd Foden yn bennaeth ar Ysgol Friars, Bangor, ac yn Bennaeth Strategol Ysgol Dyffryn Nantlle, Penygroes cyn iddo gael ei arestio ym mis Medi 2023. 

Roedd yn un o brifathrawon mwyaf blaenllaw a phrofiadol Cymru cyn i'w yrfa ddod i ben.

Yn dilyn ei achos llys, cafodd rhaglen arbennig o'r Byd ar Bedwar ei darlledu ym mis Mehefin, yn edrych ar ymchwiliad Heddlu'r Gogledd, a siarad gydag unigolion i geisio deall sut na wnaeth yr awdurdodau weithredu i rwystro camdriniaeth Foden.

Mae modd gwylio'n rhaglen yma.