Mae 10 yn rhagor o eiriau Cymraeg wedi eu hychwanegu at eiriadur Prifysgol Rhydychen, yr Oxford English Dictionary.

Mae’r geiriadur eisoes yn cynnwys llond llaw o eiriau Cymraeg, gan gynnwys “cwtsh”.

Mae geiriau sydd wedi eu defnyddio ar draws y DU ac am “gyfnod amser rhesymol” yn cael eu cynnwys yn y geiriadur.

Dywedodd golygyddion y geiriadur eu bod nhw’n eiriau yr oedd yr iaith Saesneg wedi eu “benthyca” o’r Gymraeg.

Y geiriau a’r ymadroddion sydd wedi eu cynnwys yw: 

• Calennig
• Iechyd da
• Ych a fi
• Twp
• Senedd
• Cawl
• Sglods
• Mam-gu/Tad-cu
• Taid

Roedd ‘Nain’ eisoes wedi ei ychwanegu yn flaenorol.

Mae’r iaith Saesneg wedi benthyca nifer o eiriau o’r Gymraeg dros y blynyddoedd, gan Seisnigeiddio rhai ohonyn nhw.

Mae rhai o’r geiriau sy’n deillio o’r Gymraeg yn cynnwys Corgi, Flannel (o gwlanen), a Bard (o bardd).

Mae rhai yn dadlau hefyd fod y gair ‘penguin’ yn deillo o ‘pen gwyn’.