Mae Heddlu’r Gogledd wedi rhybuddio pobl ifanc yng Nghaernarfon sy'n "taflu pethau" eu bod nhw'n ystyried erlyn ar ôl i fabi mewn coets gael ei daro gan un o'r taflegrau.

Dywedodd yr heddlu bod degau o bobl ifanc wedi bod yn rhan o ddigwyddiadau “gwrthgymdeithasol” yn y dref yng Ngwynedd.

Dywedodd bod grŵp o fechgyn ifanc wedi bod yn “taflu pethau” yn y dref, gan ddifrodi cerbydau a tharo un babi mewn coets. 

Fe wnaeth y llu gyhoeddi fideo ar y cyfryngau cymdeithasol (uchod) oedd yn dangos un o'r digwyddiadau honedig ar yr A4085 wrth caer Rufeinig Segontium.

“Yn ffodus, ni wnaeth y babi gael ei anafu ond mi allai'r stori fod wedi bod yn wahanol iawn,” meddai’r swyddog Jordan Jones o Dîm Plismona Cymdogaethau Heddlu Gogledd Cymru.

Dywedodd bod 14 o bobl ifanc rhwng 9-15 oed wedi’u hadnabod gan yr heddlu, ac y bydd swyddogion yn ymweld â'u cartrefi er mwyn “siarad â'u teuluoedd a rhannu gwybodaeth gydag asiantaethau partneriaid.”

“Erlyn pobl ifanc yw'r dewis olaf ond os yw'r digwyddiadau yn parhau i waethygu, bydd yn rhaid gweithredu yn ffurfiol," meddai llefarydd ar ran y llu.

"Hoffwn annog rhieni a gofalwyr i'n cefnogi ni drwy siarad â'u plant ynglŷn â ble maent yn mynd gyda'r nos a chanlyniadau ymddygiad gwrthgymdeithasol ar fywydau pobl o'u cwmpas,."

Mae’r llu yn apelio ar unrhyw un sydd â gwybodaeth neu dystiolaeth camera sy'n ywneud ag ymddygiad gwrthgymdeithasol yng Nghaernarfon, ac ar yr A4085 wrth ymyl Segontium yn benodol, i gysylltu ar unwaith.