Mae dyn wedi ei gyhuddo o achosi marwolaeth dyn arall drwy yrru'n beryglus yn Sir Benfro.

Bu farw Christopher Boyle mewn gwrthdrawiad rhwng dau gerbyd ar yr A4139 rhwng Dinbych-y-pysgod a Phenalun ddydd Llun.

Cafodd Mateusz Sikorski, 30 oed ei gyhuddo o achosi marwolaeth drwy yrru'n beryglus yn Llys yr Ynadon Llanelli ddydd Iau.

Bydd yn cael ei gadw yn y ddalfa ac yn ymddangos yn Llys y Goron Abertawe ar 7 Hydref.

'Annwyl iawn'

Dywedodd teulu Christopher Boyle, 57 oed ei fod yn berson oedd yn cynnig cymorth i bawb.

"Roedd Chris yn fab, tad brawd ac ewythr annwyl iawn," medden nhw.

"Roedd yn cael ei adnabod fel 'Mucker' gan ei ffrindiau, ac roedd yn chwarae rhan amlwg yn y gymuned a byddai’n gwneud unrhyw beth i helpu unrhyw un.”