Mae rhybudd melyn am law mewn grym yn nifer o siroedd de a chanolbarth Cymru dros y deuddydd nesaf.

Fe ddaeth y rhybudd i rym am 21:00 nos Fercher ac fe fydd yn parhau nes 23:59 ddydd Gwener.

Mae'r Swyddfa Dywydd yn rhybuddio y gallai hyn arwain at lifogydd ac amseroedd teithio hirach.

Mae siawns fach hefyd y gallai cartrefi a busnesau ddioddef llifogydd, medden nhw.

Fe allai rhai ardaloedd weld 20-40mm o law yn disgyn mewn cyfnod o awr neu ddwy, a hyd at 50-60mm yn bosib mewn rhai mannau.

Erbyn nos Iau fe all 80-100mm disgyn mewn rhai ardaloedd yn dilyn cyfnod hir o law.

"Rhowch y cyfle gorau i chi'ch hun osgoi oedi trwy wirio amodau'r ffyrdd os ydych chi'n gyrru, neu amserlenni bysiau a threnau, gan addasu eich cynlluniau teithio os oes angen," meddai llefrydd ar ran y Swyddfa Dywydd.

"Byddwch yn barod i rybuddion tywydd newid yn gyflym, mae’r Swyddfa Dywydd yn argymell eich bod yn cael y wybodaeth ddiweddaraf am ragolygon y tywydd yn eich ardal pan rydym yn cyhoeddi rhybuddion."

Bydd y rhybudd mewn grym i'r siroedd isod:

• Blaenau Gwent
• Bro Morgannwg
• Caerdydd
• Caerffili
• Casnewydd
• Castell-nedd Port Talbot
• Ceredigion
• Merthyr Tudful
• Pen-y-bont ar Ogwr
• Powys
• Rhondda Cynon Taf
• Sir Benfro
• Sir Fynwy
• Sir Gaerfyrddin
• Torfaen